Новая зброя дзяржавы ў барацьбе з вынікамі Чарнобылю: супраць ізатопаў цэльзію і хронцыю будзе змагацца рынкавы laisser-faire. Гэта дазволіць канчаткова ліквідаваць у бюджэце чарнобыльскі артыкул, а ў гатэлі «Эўропа» бідэ можна будзе паставіць ня толькі ў нумарах, але і ў ліфтах.
Як піша «БГ», надоечы, выступаючы ў «палатцы», В.Цалко, кіраўнік Дзяржчарнобылю, падзяліўся з дэпутатамі геніяльным пражэктам: на працягу 2006—2008 г. замуціць на тэрыторыі чарнобыльскай зоны некалькі свабодных эканамічных зон (СЭЗ). Лёгіка ў Цалка, відавочна, такая: пачуўшы пра нізкія падаткі, у зону прыпрэцца легіён бізнэсмэнаў. Яны дадуць працоўныя месцы тубыльцам, а мясцовым бюджэтам — грошы.
У выніку эрбэшны бюджэт нарэшце скіне зь сябе хамут чарнобыльскіх расходаў і пераключыцца на больш цікавыя праекты — напрыклад будаўніцтва пяцізоркавага гатэлю «Эўропа» зь бідэ ў кожным нумары.
Як прызнаўся сам сп.Цалко, ідэя з СЭЗ належыць не яму, а экспэртам Сусьветнага банку.
Шкада, што фармат артыкулу не дазваляе разгорнута прэзэнтаваць чарнобыльскую канцэпцыю Сусьветнага банку, канкрэтна — яго славуты рапарт №23883-BY. Ен стракаціць вясёлымі пэрламі, якія не саступаюць бацькавым: «Сярэдні памер дзіцячай дапамогі стварае ў насельніцтва зоны гультайскія настроі і пазбаўляе стымулаў да працы. … Асноўнымі прычынамі праблемаў са здароўем жыхароў зоны зьяўляюцца алькаголь і паленьне».
Куды цікавей тое, што дзяржава зьбіраецца практыкаваць новы падыход вырашэньня праблем Чарнобылю — не за кошт прагрэсіўнага пераразьмеркаваньня бюджэтных асыгнаваньняў, а за кошт стварэньня прывабнага інвэстыцыйнага клімату.
Калі так, я б раіў сп.Цалку не спыняцца на ідэі СЭЗаў, а сьмела пераносіць на беларускую глебу ўвесь гістарычны досьвед камэрцыі.
Ёсьць такі бізнэс-плян — заснаваць «Ост-Чарнобыльскую кампанію», накшталт кампаній піратаў-купцоў у сярэднявечнай Эўропе. Кампаніі трэба даць падатковыя льготы і нават капэрскую ліцэнзію — дазволіць рабаваць усіх «чаўнакоў». Памятуючы пра посьпехі «Вэст-Індыйскай кампаніі» падчас калянізацыі Карыбаў, можна не сумнявацца, што зона хутка ператворыцца ў пяшчотнае вока Бэрмуды.
Або прыгадайце — якім быў раней імідж штату Нэвада? Так-так, радыяцыйна небясьпечная зона, таму што якраз тут знаходзіцца атамны палігон дзядзькі Сэма. Але не пасьпелі ў Лас-Вэгасе адкрыць першае казыно, як сюды набегла арда бізнэсмэнаў. А чым мы дурнейшыя? Галоўнае — болей фантазіі: хвойніцкі карнавал накшталт Марды-Грас «Чарнобыльскі шлях», нараўлянскае казыно з гульнявымі аўтаматамі «Трохрукі мутант», лоеўскае шоў «Сьвяцяшчыяся ліквідатары»…
Аднак аптымальны варыянт для напампоўваньня рэгіёну грашыма — не свабодная эканамічная, а свабодная дэмакратычная зона (СДЗ). Ярмошына мусіць хутчэй абвясьціць, што парлямэнцкія выбары ў зоне адбудуцца згодна з усімі міжнароднымі стандартамі — без папярэдняга галасаваньня, з празрыстым назіраньнем, без адмінрэсурсу, з роўным доступам да СМІ…
Ведаючы напалеонаўскія амбіцыі нашых дэмакратаў, гарантую, што ўсе будуць вылучацца ад зоны. У выніку абсалютная большасьць з 40 мільёнаў баксаў, якія Кангрэс зьбіраецца адшпіліць апазыцыі, абавязкова асядуць тут — на карысьць ахвяраў Чарнобылю.
Гэта дазволіць канчаткова ліквідаваць у бюджэце чарнобыльскі артыкул. Грошай будзе шмат. Так шмат, што ў гатэлі «Эўропа» бідэ можна будзе паставіць ня толькі ў нумарах, але і ў ліфтах.
Лёлік Ушкін, левы радыкал
Каментары