Прапагандысты пасля роліку ў тыктоку паехалі ў вясковую краму — там ужо ўсе задаволеныя, а паліцы поўныя
Пракурор жа паабяцаў пакаранне тыктокерам за хлусню.
Днямі ў тыктоку стаў вірусным ролік, у якім жыхары вёскі Добры Бор, што ў Баранавіцкім раёне, звярнуліся да мясцовых уладаў з просьбай вырашыць праблему з сельскай крамай. Паводле іх слоў, хоць крама і працуе, там амаль нічога няма — паліцы пустыя, не знайсці нават малака, цукру і марожанага.
Аўтары звароту — сям’я, якая жыве ў вёсцы ўсё лета. Жанчына выказала здагадку, што пастаўкі разлічваюцца толькі на колькасць пастаянна зарэгістраваных жыхароў, а не ўлічваецца, што летам у вёску прыязджае шмат людзей з дзецьмі, каб адпачываць і траціць грошы.
Прапагандысты з АНТ вырашылі абвергнуць гэты ролік — маўляў, усяго хапае.
У сюжэце АНТ крама выглядае даволі прыстойна. Але дзіўна было б, калі б перад прыездам дзяржаўнага тэлебачання ды начальнікаў з райспажыўтаварыства было інакш.
Карэспандэнты спыталі пад камеры ў мясцовых жыхароў: ці лёгка ў вёсцы дастаць малако і ці хапае ім усяго?
— Мясцовыя жыхары ніколі не скардзіліся, — кажа адна з мясцовых бабуль. — Нам усяго хапала, нас усё задавальняла. Асабліва цяпер — прадавец вельмі добрая, у краме чысценька, акуратна, ветліва. Што яшчэ трэба? А каму не падабаецца — хай вязуць з сабой ежу з Баранавічаў. Усё ў нас ёсць.
— Я пераехаў з горада ў вёску, бо мяне ўсё задавальняе. Што мне трэба? Хлеб ды цыгарэты, — кажа іншы мужчына.
Яшчэ адзін мужчына расказаў, як улады выконваюць усе іх просьбы:
— Прасілі асвятленне [у краме] — зрабілі. Прасілі перастаноўку — зрабілі. Прасілі асартымент — ёсць. Прасілі халадзільнае абсталяванне — маецца, — расказвае мясцовы пра тое, як было да гэтага.
Паводле прапагандыстаў, рэзананснае відэа выклікала гнеў у сяльчан:
— Няхай крама маленькая, але родная. Не ўсё ідэальна, бывае, што людзей то многа, то мала. Але каб зусім нічога не было — такога ніколі не здаралася.
На відэа старанна запэўніваюць: усё вельмі добра, а сітуацыя здарылася з-за гарачых выходных. Быў ажыятаж, таму не паспелі падлічыць патрэбную колькасць тавараў.
— У нядзелю раніцай яшчэ бралі марожанае, а ўвечары яго ўжо амаль не засталося. Прыходзілі людзі — забралі. І малака апошнюю бутэльку забралі. Калі б не было такога наплыву, хапіла б усім. У панядзелак зноў бы завезлі, — апраўдваецца разгубленая прадавачка.
Начальнікі з райспажыўтаварыства тлумачаць:
— Трэба разумець, што вясковыя крамы не прыносяць прыбытку. Але пакінуць людзей без гандлю мы не можам, бо прыватнікі туды ісці не спяшаюцца. У сельскай мясцовасці не заўсёды будзе вялікі выбар тортаў ці, напрыклад, скумбрыі вэнджанай. Але калі прадавец дае заяўку ў РАЙПО — на наступны дзень прывозяць усё неабходнае.
Прапагандысты ж дадалі яшчэ адзін аспект у сюжэт: маўляў, у апошні час «з’явілася мода на ўкіды — дзеля хайпу і лайкаў». «Між тым, распаўсюджванне недакладнай інфармацыі можа мець наступствы», папярэджваюць прапагандысты. І пайшлі да пракурора па каментарый. Баранавіцкі пракурор Аляксандр Карлюк прыгразіў тым, хто скардзіцца ў інтэрнэце, адказнасцю за хлусню.
Каментары