Paŭstahodździa tamu čempijanat Lidy pa šachmatach vyjhraŭ pieršakatehornik Vacłaŭ Hiebielt (1913—1999). Paźniej jon zrabiŭsia słavutym kampazytaram-prablemistam dy ačoliŭ haradzkuju šachmatnuju federacyju.
Zavitaŭšy ŭ šachmatna-šašačny klub u Lidzie, što mieścicca ŭ pakojčyku pry ŭpraŭleńni sportu i turyzmu harvykankamu, ja napatkaŭ tuzin amataraŭ blicu. Hulajuć jany na ŭzroŭni druhoha-pieršaha razradu. Turniry ŭ Lidzie ładziacca redka, apošniaje pieršynstvo horadu prajšło dva hady tamu, chto pieramoh, nia pamiatajuć. Naviedvalniki klubu kudy bolš achvotna raskazvajuć pra ŭradženca horadu Alaksieja Čarnuševiča. Zavajavaŭšy zvańnie mižnarodnaha majstra, jon źjechaŭ u Francyju navučać šachmatam francuskich dziaciej. Majstroŭ pa vočnaj hulni ŭ horadzie amal nie zastałosia.
U klubie visiać partrety čempijonaŭ śvietu, na stoliku — šachmatnyja časopisy epochi Hiebielta. Utulna, ale sumnavata. Michał, dziažurny pa šaškach, davoli chutka vyhaniaje nas vonki — klub adkryvajecca a piataj viečara, a začyniajecca a vośmaj. Trener Uładzimier Levy, jaki viadzie hrupy ŭ dziciača-junackim klubie, narakaje na kankurentaŭ: «Jak stvaryli kamputarnyja kluby — pačaŭsia adsieŭ. Školnikam bolš cikavyja «stralałki».
Viedy pra šachmaty pašyrajucca praz rajonnuju hazetu. Praŭda, sioleta adździeł chacieli prykryć, ale dapamoh čytač-invalid, patelefanavaŭ staršyni rajvykankamu, što choča nadalej čytać pra šachmaty. Materyjały ŭ «Lidskaj haziecie» pryśviečany najpierš kampazycyi: Aleś Symanovič ličyć jaje samastojnaj halinoj mastactva. A voś dla 39-hadovaha bulbavoda, byłoha desantnika Viktara Voŭčaka ź vioski Kasoŭščyna — heta chobi. Voŭčak, šmatrazovy čempijon krainy ŭ składańni zadač, vypuściŭ knihu pa kampazycyi, ciapier rychtuje druhuju.
U horadzie pracujuć niekalki prafesijnych treneraŭ: Jury Dajlidka, kandydat u majstry Siarhiej Bancevič. Ale mnie zdałosia, što tutejšyja amatary šachmat addajuć pieravahu šlachu Hiebielta—Symanoviča—Voŭčaka. Naŭrad ci ŭ Lidzie razbudujecca ŭłasnaja škoła, ale kampazycyja jak srodak vychavańnia estetyčnych pačućciaŭ pieražyvie lubyja niahody.
Kamientary