Kiraŭnik rasijskaha ŭrada Dźmitryj Miadźviedzieŭ miarkuje, što sudzić raźvićcio demakratyi ŭ Rasii pa «hamburhskim rachunku» možna budzie tolki praz 100 hadoŭ, bo ŭ krainie nikoli nie było demakratyčnych tradycyj i adpaviednyja instytuty hramadstva zanadta maładyja.
«My robim tolki samyja pieršyja kroki, raźvivajučy svaju palityčnuju sistemu, raźvivajučy instytuty demakratyi ŭ našaj krainie. I nas nielha sudzić pa „hamburhskim rachunku“, z samych vysokich pazicyj. Davajcie tak: kali projdzie 100 hadoŭ i buduć niejkija prablemy, tady, napeŭna, niešta nie tak adbyvałasia ŭ hetyja hady», — zajaviŭ Miadźviedzieŭ u sieradu ŭ intervju jeŭrapiejskim ŚMI.
Kiraŭnik urada skazaŭ, što niejkija paproki ŭ adras Rasii ab parušeńniach pravoŭ čałavieka «absalutna niespraviadlivyja i navat kryŭdnyja dla našaj krainy», a niejkija — «častkova spraviadlivyja». Pry hetym jon paćvierdziŭ, što ŭ Maskvie hatovyja da kanstruktyŭnaha dyjałohu pa hetych pytańniach, u pryvatnaści pa sudovaj sistemie, i padkreśliŭ, što ŭ Rasii niama niejkaha asablivaha razumieńnia demakratyi.
«My zychodzim z taho, što ŭ nas ahulnyja padychody da raźvićcia palityčnaj sistemy — abarona pravoŭ i svabodaŭ čałavieka, abarona kanstytucyjnych svabodaŭ. My ničym nie adroźnivajemsia ad jeŭrapiejskich krain. My nie bačym dla siabie asobnaha, śpiecyjalnaha šlachu demakratyi, jakaja hruntujecca na niejkich asablivych padychodach Rasii. My ličym, što demakratyja — heta ŭniviersalnaja reč. Ale demakratyja i kanstytucyjny paradak, palityčnaja sistema ŭ kožnaj krainie nosiać nacyjanalny charaktar «, — skazaŭ Miadźviedzieŭ.
Premjer rastłumačyŭ, što adroźnieńni i niuansy jość navat u krain, jakija ŭ minułym byli adzinym cełym. Rasijskija niuansy, pa jaho słovach, źviazanyja z adsutnaściu demakratyčnych tradycyj i bolš vysokaj «stupieńniu intehravanaści ŭ tatalitarnyja schiemy kiravańnia», čym u inšych krain.
«Uvieś saviecki pieryjad u nas nie było nijakaj demakratyi. A heta šmat hadoŭ! A kali źviarnuć pozirk na darevalucyjnaje žyćcio, to tam taksama sa zrazumiełych pryčynaŭ byŭ absalutyzm, i nijakaj demakratyi nie było», — nahadaŭ jon i zaklikaŭ svaich jeŭrapiejskich kaleh uličvać hety faktar.
Kamientary