Elektaratu zastajecca hadać, na jakuju sumu jaho aščaślivili:) Piša ŭ svaim błohu Alaksandar Kłaskoŭski.
Biaź lišniaj ahałoski dziaržava pradaje (ci ŭžo pradała) svoj pakiet akcyj "Velcom". Va ŭsiakim razie, tak śćviardžajuć vartyja davieru krynicy. Pakazalna, što reparter "NN" musiŭ zładzić cełaje žurnalisckaje raśśledavańnie dziela taho, kab spraŭdzić infarmacyju.
Zrazumieła, nia toj vypadak, kab dźmuć u fanfary. Kiraŭnictva svaimi rukami pakrysie raskručvaje idealahičnyja šrubki "biełaruskaj madeli".
Niekali hanarylisia, naprykład, što nie pazyčajem hrošaj u imperyjalistyčnych vorahaŭ. Nie takija, maŭlaŭ, durni, kab u kabału da hidry traplać. Možna było imitavać hordaje čučche na rasiejskich datacyjach. Ciapier ža ŭrad prosić tyja kredyty va ŭsich zapar. I, kaniešnie ž, nia nadta chvalicca pierad ajčynnaj publikaj hetaj pieramienaj kursu. Kali i kažuć pra zamiežny doŭh, to pra dziaržaŭny. Jon pad miljard dalaraŭ. Heta nie katastrafična. Ale razam z karparatyŭnymi zapazykami (kamercyjnych bankaŭ, realnaha sektaru ekanomiki) ličba pierasiahnuła vosiem miljardaŭ, pryčym miljard pryros tolki sioleta. I heta ŭžo adčuvalna. Apetyt miž tym raście. Čym budziem raźličvacca?
Niekali hučała z trybunaŭ, što Radzimu raspradavać nie źbirajemsia (a kali što i pradadzim u paradku vyklučeńnia — dyk vyklučna prazrysta!). "Biełtranshaz" zdavaŭsia nieprystupnaj cytadellu. Ale praces spakvala pajšoŭ.
Kaniešnie, kali biez falšyvaha patasu, dyk u razumnym prodažy akcyjaŭ zamiežnikam strachu niama. Mahčyma, i pakiet sotavaha aperatara pajšoŭ na całkam vyhadnych dla Biełarusi ŭmovach. Ale narodnaja ŭłada nie śpiašajecca reklamavać pierad narodam takija hiešefty. Voś i hadaje elektarat, na jakuju sumu jaho aščaślivili:)
Darečy, lažačaje "Motavieła" niadaŭna biaz šumu i pyłu pradali za 15,6 młrd. rubloŭ aŭstryjskaj firmie. Praŭda, jana nibyta i nie zusim aŭstryjskaja. I znoŭ prostyja śmiarotnyja čuchajuć patylicu.
Kali ž abstrahavacca ad detalaŭ, to vidavočna: praces sapraŭdy pajšoŭ. Ale nie zusim toj, pra jaki maryli liberalnyja ekanamisty. Im mroilisia reformy, a tut i rasprodaž dziaržaŭnych aktyvaŭ, i rost zamiežnych daŭhoŭ, i navat achviaravańnie idealahičnym čučcheizmam, — usio heta najpierš dziela taho, kab kryj boža nie dajšło da reformaŭ:)
Kamientary