Pačnu z frazy, hodnaj dla Kapitana Vidavočnaści: detektyŭ — samy papularny ŭ śviecie litaraturny žanr.
U Biełarusi toje samaje, zajdzicie ŭ minskaje mietro dy pahladzicie, kaho čytajuć pasažyry: Dancova, Marynina, Daškava. Krychu bolš padrychtavanyja čytačy hłytajuć Barysa Akunina, Ju Neśbio, Styha Łarsana. Ci navat prydumanaha aŭtara, hieroja telesieryjała Ryčarda Kasła.
Heta ŭsio sučasnyja aŭtary, jakija pišuć ciapier (za vyklučeńniem niabožčyka Łarsana) i karystajucca papularnaściu.
Biełaruskaja litaratura apošnich hadoŭ amal zusim nie pradukuje detektyvaŭ.
Pahladzieŭ rejtynh biełaruskich detektyvaŭ, što składała na sajcie radyjo «Svaboda» Natałka Babina. Adny adnosiacca jašče da savieckich časoŭ («Čorny zamak Alšanski» i «Dzikaje palavańnie karala Stacha» Karatkieviča), inšyja da 90ch (Fiedarenka, Sarokin, Jałuhin). Zhadvajucca jašče braty Adamčyki (Mirasłaŭ Adamčyk i Adam Hłobus), Uładzisłaŭ Achromienka dy Maksim Klimkovič. Dumaju, kahości abaviazkova zabyŭsia, ale śmieła možna kanstatavać — detektyvy nie pišucca.
Chacia, zdavałasia b, siužetaŭ chapaje ź liškam. Pahladzicie navat tuju ž «našaniŭskuju» rubryku zdareńni. Byvajuć takija historyi, što pazajzdrościli b lubyja aŭtary.
Biary i raskručvaj. Čahočaho, a złačynstvaŭ u siońniašniaj Biełarusi chapaje.
Hoład na adsutnaść biełaruskamoŭnych detektyvaŭ krychu spatolili pierakładčyki ź internet-časopisa «Prajdziśviet». U knizie, jakuju jany ŭkłali, sabrana 16 apaviadańniaŭ roznych pa nacyjanalnaści i časie žyćcia aŭtaraŭ.
Tut jość usio: zabojstvy, kradziažy, padmany, atručvańni.
Vydatnyja syščyki, jak katalicki śviatar Braŭn u anhlijskaha piśmieńnika Čestertana, ci Elery Kuin u amierykanskaha piśmieńnika… Elery Kuina. A voś hieroj ruskamoŭnaha izrailskaha piśmieńnika Daniela Kruhiera niaścierpna nahadvaje Vilhielma Baskiervilskaha z «Imia ružy» (taksama detektyŭ) Umbierta Eka.
Parodyja Breta Harta na Šerłaka Chołmsa prymusić vas uhołas śmiajacca. A słavačka Danieła Kapitaniava pachulihaniła, ujaviŭšy, jak samyja znakamityja syščyki śvietu (ad Erkiula Puaro da ahientaŭ Małdera i Skali z «Sakretnych materyjałaŭ») rasśledujuć adno i toje ž zabojstva.
«Złačynstva, ser» — adnaznačna dobraja kniha.
Ale piersanalna mnie nastupny raz chaciełasia b pračytać jakasny vialiki detektyŭ, abjomam z hety zbornik. Dobra, kali pierakładny, a jašče lepš — u aryhinale stvorany pabiełarusku.
Kamientary