Na kanfierencyi Nacpłatformy prahučali płany pra Płošču-2015

Kala piacidziasiaci niedziaržaŭnych arhanizacyj paŭdzielničali ŭ kanfierencyi Nacyjanalnaj płatformy Forumu hramadzianskaj supolnaści.

Adzin z udzielnikaŭ — 25-hadovy Jaŭhien Bojka z Mahilova – ahučyŭ na mierapryjemstvie svaju inicyjatyvu pad pracoŭnaj nazvaj «Stratehija-2015». Klučavoje miesca ŭ joj zajmaje padrychtoŭka ludziej da vuličnaj baraćby, ci Płoščy, na budučych prezidenckich vybarach.

Chłopiec nie bačyć inšaha sposabu dabicca hramadzianskich pravoŭ u našaj krainie.

Niekatoryja ŭdzielniki ideju maładziona ŭspryniali, miakka kažučy, skieptyčna.

Staršynia kanfiederacyi pradprymalnikaŭ Uładzimir Karahin kateharyčna vykazaŭsia, što «kairskija płoščy dla nas nieprymalnyja»: «My za toje, kab adbudoŭvać narmalnuju hramadzianskuju supolnaść u narmalnych cyvilizacyjnych pracesach. Šmat zroblena pamyłak, my hublajem ad hetaha nacyjanalnuju kankurentazdolnaść».

Jahony ciozka mietadołah Uładzimir Mackievič paraiŭ Nacpłatformie pazbaŭlacca naiŭnaści, biazdumnaha ramantyzmu i šapkazakidalnictva.

Apazicyjnyja palityki Alaksiej Janukievič (BNF), Juraś Hubarevič («Ruch za svabodu») i Siarhiej Vaźniak («Havary praŭdu») ahučyli na kanferiencyi ideju «Narodnaha refierendumu».

Sutnaść u tym, kab da 2015 hoda sabrać paŭmiljona podpisaŭ pa važnych dla ŭsich biełarusaŭ pytańniach.

Na siońnia arhanizatary refierendumu vyznačyli 10 bazavych pytańniaŭ. Pa vynikach kansultacyj z ekśpiertami — ekanamistami, palitołahami, zastaniecca piaciorka najvažniejnych.

Chočacca vieryć, što inicyjatary prakansultujucca jašče i z movaznaŭcami. Tekst, jaki byŭ razdadzieny ŭdzielnikam kanfierencyi, spres u pamyłkach i abdrukoŭkach. Adna nazva čaho vartaja – «Za piermieny!».

Dla hramadskaj supolnaści Biełarusi pa-raniejšamu aktualnyja dźvie prablemy, ličyć Siarhiej Mackievič, staršynia rabočaj hrupy Asamblei NDA.

Pa-pieršaje, biełarusy mała viedajuć pra tyja mahčymaści, jakija prapanuje Jeŭrapieŭski sajuz, u tym liku pa linii Uschodniaha partniorstva. Pa-druhoje, biełaruskija ŭłady da ŭsich hetych prapanovaŭ staviacca admoŭna.

U takoj situacyi hramadskija arhanizacyi nie ŭsprymajucca naležnym čynam ani «viarchami», ani «nizami».

«Da ŭładaŭ my ŭvieś čas źviartajemsia, ale vodhuku nie znachodzim. Na žal, nas nie ŭsprymajuć jak narmalnych partnioraŭ.

Chutčej, naadvarot, jak vorahaŭ», ličyć Siarhiej Mackievič.

Darečy, na kanfierencyi prysutničali «delehaty» śpiecsłužbaŭ. Spačatku adzin čałaviek. A bližej da vystupaŭ apazicyjnych palitykach dałučylisia jašče dva typy ŭ čornaj vopratcy.

Staršynia Nacpłatformy Uład Vialička pahadžajecca, što mahčymaści NP upłyvać na situacyju ŭ krainie vielmi abmiežavanyja. Tamu na pieršy płan vychodzić praca ŭnutry supolnaści.

Jaŭhien Bojka («Mahiloŭskaja adukacyjnaja inicyjatyva») rasčaravany dziejnaściu Nacpłatformy. Raniej było razumieńnie, što jość hałoŭnaja meta: demakratyzacyja Biełarusi praz abjadnańnie «treciaha siektara», potym – demakratyčnaj apazicyi. I dalej, praz abjadnańnie i pieršych, i druhich – hramadski cisk na ŭłady, kab vymusić ich iści na reformy.

A jeŭrapiejski nakirunak byŭ na druhim miescy. Ciapier ža ŭsio pieraviarnułasia dahary nahami, kaža chłopiec:

«I heta robiać ludzi, jakija krytykavali raniej tych, chto jeździŭ zanadta bahata ŭ Jeŭropu i pryśviačaŭ bolš uvahi niejkim sustrečam u Jeŭropie, čym pracy tut. Biada takaja, niejkaja chvaroba».

Na jaho dumku, u Biełarusi stvaryłasia «pieradrevalucyjnaja situacyja». Hramadstva zastyła ŭ čakańni prapanovaŭ. Toj, chto adkaža, biez demahohii i pryhožych słovazłučeńniaŭ, jak arhanizavać cisk na ŭłady, jak ich vymusić iści na sastupki, atrymaje vializnuju padtrymku hramadstva.

U svaju čarhu, kiraŭniki Nacyjanalnaj płatformy bačać pahrozu ŭ tym, što paśla samita Uschodniaha partniorstva Jeŭrasajuz moža stracić intares (a značyć, i padtrymku) da Biełarusi dy inšych «prablemnych» dziaržaŭ-udzielnic.

I pieraklučycca na «paśpiachovyja» Ukrainu, Hruziju i Małdovu. Miarkujecca, što hetyja try krainy praź niekalki tydniaŭ padpišuć damovy ab asacyjacyi ź Jeŭrasajuzam.

Andrej Jahoraŭ («Centr jeŭrapiejskaj transfarmacyi») ličyć, što Jeŭrasajuzu varta i tam, i tam uzmacnić svaju prysutnaść. U krainach-lidarach — kab realizoŭvać padpisanyja pahadnieńni. U aŭtsajdarach — bo treba zrušyć situacyju ź miortvaha punktu. Pytańnie, jak heta zrabić. Na dumku Jahorava, treba prapanoŭvać Biełarusi novyja instrumienty i prahramy dla supracoŭnictva.

U vynikovaj rezalucyi ŭdzielniki kanfierencyi zaklikajuć Jeŭrasajuz nie dapuścić niaroŭnaha staŭleńnia da krain Uschodniaha partniorstva ŭ zaležnaści ad prahresu krainy ŭ hetaj inicyjatyvie.

A biełaruskija ŭłady — zabiaśpiečyć, kab na samicie ŭ Vilni Biełaruś reprezientavaŭ čynoŭnik, nie nižejšy pa ranhu za kiraŭnika Ministerstva zamiežnych spraŭ.

• 0
• 0
• 0
• 0
• 0
• 0
• 0
• 0