Lidar Ruchu «Za svabodu», kandydat na prezidenckich vybarach 2006 h. Alaksandr Milinkievič na schodzie aktyvistaŭ Ruchu pad Miadziełam raspavioŭ svajo bačańnie metaŭ biełaruskaj apazicyi na prezidenckich vybarach — 2015, paviedamlaje pres-słužba arhanizacyi.
Ahulny stan demakratyčnych siłaŭ Milinkievič acharaktarazavaŭ jak niezdavalniajučy: «U takim stanie jak siońnia demsiły jašče nie byli».
Staršynia Ruchu «Za svabodu» pierakanany, što situacyja nie źmienicca, «pakul my nie skažam, čaho chočam i jakija mety stavim na kampaniju».
«Možna metaj nazvać padvyšeńnie rejtynhu papularnaści i viadomaści svajoj partyi ci arhanizacyi. Ale kansalidacyi tady nie budzie. Meta moža być mierkantylnaja – hrošy.
Naturalna, i ŭ takim razie nie budzie abjadnańnia. Na maju dumku, nam treba dbać pra ŭzmacnieńnie pazicyj usich demakratyčnych sił i raskrucić na lidara čałavieka, jakoha my nie «źniščym» adrazu paśla vybaraŭ.
Ja vystupaju za toje, kab heta byŭ adnosna małady čałaviek. Maładych i prystojnych chapaje. Ale razam z tym važnaja i bijahrafija. Bo ludzi časta pytajuć: «A čym jon kiravaŭ, čaho dasiahnuŭ?».
Što praŭda, heta zrabić składana. Dyj prykłady Čyhira, Maryniča, Kazulina pakazvajuć, čym heta moža skončycca, kali ŭ vialikuju palityku pojdzie asoba z uładnych kołaŭ z dośviedam kiravańnia», - zajaviŭ Milinkievič.
Jon taksama zaznačyŭ, što «kali ŭ elektaralnaj kampanii 2015 hodu budzie ŭdzielničać Łukašenka, vybaraŭ nie budzie».
«Hałoŭnaje – vyjhrać vybary paśla Łukašenki. Vyjhrać na karyść jeŭrapiejskaha vybaru! Tamu Ruchu nieabchodna aktyvizavać pracu ŭ kirunku jeŭrapieizacyi Biełarusi», - skazaŭ Milinkievič.
Kamientary