Niezaležnaja hazeta «Narodnaja Vola» i žurnalistka Maryna Koktyš prajhrali sud Alehu Pralaskoŭskamu.
U paniadziełak sudździa Leninskaha rajonu Miensku Taciana Žułkoŭskaja vyniesła abvinavaŭčy prysud niezaležnaj hazecie «Narodnaja Vola» i jaje žurnalistcy Marynie Koktyš. Rašeńniem sudu z «Narodnaj voli» spahoniać 25 młn rubloŭ, a z žurnalistki — 2 miljony na karyść kiraŭnika hałoŭnaha idealahičnaha ŭpraŭleńnia Administracyi prezydenta RB Aleha Pralaskoŭskaha. Pieršaje sudovaje pasiedžańnie pa hetaj spravie adbyłosia 26 vieraśnia.
Pretenzii hałoŭnaha ideolaha krainy vyklikała publikacyja «Uładzimier Choład pa-raniejšamu znachodzicca na svabodzie» u numary “NV” ad 2 žniŭnia. Pra samoha Pralaskoŭskaha tam było ŭsiaho niekalki radkoŭ, jaki i stali padstavaj dla zvarotu ŭ sud z metaj abarony hodnaści i dziełavoj reputacyi.
Sudździa Žułkoŭskaja, jakaja letaś asudziła na dva hady turmy pravaabaroncu Kaciarynu Sadoŭskuju, amal całkam zadavoliła pazoŭ ideolaha.
Chiba tolki zamiest 28 miljonaŭ, jakija patrabavaŭ pazoŭnik, «Narodnaj Vola» budzie spłočvać 25 miljonaŭ, nakont Koktyš pakarańnie zastałosia takim ža, jak i patrabavaŭ pazoŭnik.
"Ja dahetul nie razumieju, jak možna pryznać nie adpaviednaj rečaisnaści, da prykładu, frazu "no Proleskovskij na svobodie", i jakim čynam hetaja fraza moža źniavažyć jaho honar…", — prakamentavała vynik sudu Maryna Koktyš.
«Siaredzič čamuści nie zaprašaŭ na praces žurnalistaŭ», — dzivicca pravaabaronca Valer Ščukin, jaki prysutničaŭ na vyniasieńni prysudu. Jon dziela hetaha specyjalna pryjechaŭ ź Viciebsku. Usia pracedura, pavodle jaho słovaŭ, doŭžyłasia 15 chvilinaŭ.
Na praciahu 10 dzion adkazčyki źbirajucca padać skarhu na sudovaje rašeńnie ŭ Mienski haradzki sud. Kasacyjnaja skarha moža razhladacca ciaham miesiaca. Kali rašeńnie budzie admoŭnym, praź dziesiać dzion z momantu razhladu kasacyjnaj skarhi štrafy treba budzie spłacić.
Aleh Pralaskoŭski paabiacaŭ vyjhranyja ŭ sudzie hrošy nakiravać na dapamohu adnamu ź biełaruskich dziciačych damoŭ. Vypłata takoha bujnoha štrafu znoŭ stavić pad pytańnie dalejšy vychad niezaležnaha vydańnia.
Pa ironii losu 1 kastryčnika, u dzień vyniasieńnia prysudu, — dzień narodzinaŭ i ŭ Iosifa Siaredziča, i ŭ Aleha Pralaskoŭskaha. Hałoŭnamu redaktaru “Narodnaj Voli” spoŭniłasia 58 hadoŭ, hałoŭnamu ideolahu — 44.
Kamientary