35-hadovuju Alenu Ahiej pryznačyli namieśnicaj kiraŭnika Hrodzienščyny FOTA
Siońnia Łukašenka zrabiŭ šerah kadravych pryznačeńniaŭ. U pryvatnaści, źjavilisia novyja namieśniki staršyni Bresckaha, Hrodzienskaha i Mahiloŭskaha abłvykankamaŭ.
Andrej Klec, jakoha pryznačyli namieśnikam Kanstancina Sumara, da hetaha byŭ kiraŭnikom Leninskaha rajona Bresta. Klecu 41 hod. Jon naradziŭsia ŭ Varoniežskaj vobłaści (Rasija), ale ros u Kobrynie. Skončyŭ Horackuju sielskahaspadarčuju akademiju.
«Kiraŭnik pavinien vałodać dobraj kamunikabielnaściu, pamiarkoŭna stavicca da apanientaŭ, ale pry hetym nie bajacca brać na siabie adkaznaść za pryniatyja rašeńni», — kazaŭ u intervju «Viečierniemu Briestu» Andrej Klec.
Uładzimir Kisialoŭ staŭ pieršym namieśnikam kiraŭnika Mahiloŭskaha abłvykankama. Da hetaha jon uznačalvaŭ Kaściukovicki rajvykankam. A jašče raniej byŭ dyrektaram «Biełaruskaha cemientnaha zavoda» (pryčym, uznačalvaŭ pradpryjemstva bolš za 10 hadoŭ).
Alena Ahiej stała namieśnicaj staršyni Hrodzienskaha abłvykankama. Joj 35 hadoŭ. Dla biełaruskich čynoŭnikaŭ heta vielmi małady ŭzrost. Jana rodam z Horak. Tam ža skončyła sielskahaspadarčuju Akademiju. Žyła ŭ Mastach, dzie ŭznačalvała miascovoje kamunalnaje pradpryjemstva mielijaratyŭnych sistem. Adtul jaje i pieraviali ŭ Hrodna.
Pracavała na roznych pasadach i abł- i rajvykankamie. Apošnim časam kuryravała u harvykankamie pytańni ekanomiki, handlu, śfiery pasłuh, pracy, zaniataści, pryvatyzacyi i statystyki.
«Mnie impanuje pryncyp Chorasa Fletčara, jaki kaliści skazaŭ: «Kali łaska, vypraŭcie ŭmovy žyćcia ludziej - i ludzi stanuć lepšymi, kab być hodnymi hetych umovaŭ», — niekali kazała sp.Ahiej.
Źviartaje na siabie ŭvahu, što na siońniašni dzień Alena Ahiej –- adzinaja žančyna siarod staršyń i ich namieśnikaŭ u abłvykankamach. U kožnaha staršyni majecca pa 5—6 namieśnikaŭ, ale žančyn na siońnia ŭ kiraŭnictvie abłaściej nie było zusim.
U Łahojsku piekar admaŭlajecca pradavać svoj chleb pakupnikam, u jakich jość sabaki84
Kamientary