Alaksandr Łukašenka patrabuje terminovych mier pa paskareńni budaŭnictva Kitajska-biełaruskaha industryjalnaha parku.
Na hetym jon akcentavaŭ uvahu siońnia, vystupajučy na naradzie pa pytańniach Kitajska-biełaruskaha industryjalnaha parku.
Łukašenka zapatrabavaŭ abjektyŭnaj acenki situacyi i vyraznaha abaznačeńnia dziejańniaŭ dla paskareńnia budaŭnictva parku. Alaksandr Łukašenka adznačyŭ, što hetamu maštabnamu prajektu nadajecca asablivaje značeńnie.
Jon źjaŭlajecca nie tolki znakavym prykładam stratehičnaha supracoŭnictva Biełarusi i Kitaja, ale i važnym stymulujučym faktaram raźvićcia ekanomiki.
Pavodle słoŭ Łukašenki, realizacyja hetaha prajekta adkryvaje pierśpiektyvy ŭkaranieńnia vysokich technałohij, a taksama pieradavoha suśvietnaha vopytu viadzieńnia biźniesu, mieniedžmientu, budaŭnictva i kiravańnia pramysłovymi pradpryjemstvami. Abjomy rabot i kapitałaŭkładańniaŭ vializnyja. Bo, pa sutnaści, pobač sa stalicaj uzvodzicca novy horad, stvarajecca samastojnaja terytaryjalna-ekanamičnaja adzinka. Tut nie tolki raźmiaščeńnie inavacyjnych, ekspartaaryjentavanych vytvorčaściej, ale i stvareńnie kamfortnych umoŭ dla žyćcia ludziej.
Łukašenka padkreśliŭ, što śpiecyjalnym ukazam byŭ ustanoŭleny lhotny padatkovy režym, jaki daje mahčymaść vytrymać kankurencyju jak na rynku Mytnaha sajuza, tak i Jeŭrapiejskaha sajuza. «Stvorany asablivy dziaržaŭna-pryvatny miechanizm kiravańnia parkam, sfarmiravany adpaviednyja arhanizacyjnyja struktury», - adznačyŭ Alaksandr Łukašenka.
Razam z tym kiraŭnik dziaržavy vykazaŭ niezdavalnieńnie tempami stvareńnia parku. Jaho naściarožvaje, što, niahledziačy na vialikaje dziaržaŭnaje značeńnie, jakoje nadajecca parku, praces jaho stvareńnia idzie vielmi marudna, kali nie skazać, što nie idzie nijak. Pavodle słoŭ Łukašenki, «heta jašče adna chiba z boku ŭrada i adkaznych asob». Naprykład, tolki na raspracoŭku i ŭzhadnieńnie hienieralnaha płana pajšło vosiem miesiacaŭ, što niedapuščalna doŭha.
Alaksandr Łukašenka taksama adznačyŭ, što da hetaha času nie rasstaŭleny ŭsie kropki ŭ pytańniach finansavańnia hetaha prajekta.
«My damaŭlalisia, što park - heta nie prosta skopišča niejkich pradpryjemstvaŭ, tym bolš jakija ŭžo isnujuć u Biełarusi i vyrablajuć peŭnyja tavary, - skazaŭ Alaksandr Łukašenka. - Navošta, naprykład, novy traktarny zavod u parku, zavod pa vytvorčaści hruzavych aŭtamabilaŭ? Tyja pradpryjemstvy, jakija ŭžo jość u Biełarusi, u parku nie patrebny. My damovilisia, što ŭ Biełarusi, u centry Jeŭropy, kali i stvarać pramysłovuju vytvorčaść, to jana pavinna być samaj pieradavoj, i, zrazumieła, na hetaj terytoryi pavinny być pradstaŭleny pierśpiektyŭnyja pradpryjemstvy, suśvietnyja brendy». Hetyja pytańni Łukašenka daručyŭ uziać na kantrol premjer-ministru i siońnia choča pačuć realnuju situacyju spraŭ i, u pryvatnaści, kolki brendaŭ u hetym parku.
Łukašenka zakranuŭ taksama temu infarmacyjnaj raboty pa pryciahnieńni ŭ park rezidentaŭ. «MZS razasłała pa pasolstvach 1,5 tys. brašur, ab hetym zrabili spravazdaču i kropka, lahli na dno, čakajuć. Što vy čakajecie?» - zadaŭ pytańnie kiraŭnik dziaržavy.
Alaksandr Łukašenka skazaŭ, što jamu pradstavili prajekt novaha ŭkaza pa parku. «Ja nie suprać abmierkavać hety ŭkaz. Ale bajusia, što jaho moža napatkać los papiaredniaha, padpisanaha ŭkaza (ab stvareńni parku. - Zaŭvaha BIEŁTA)», - adznačyŭ jon. Alaksandr Łukašenka pacikaviŭsia, navošta patrebny novy dakumient. Jon zapatrabavaŭ abjektyŭnaj acenki situacyi i prapanoŭ pa paskareńni budaŭnictva parku.
Kiraŭnik dziaržavy pradoŭžyŭ: «Kali haračyja hałovy, jakija prapanoŭvali hety park, siońnia astyli i ličać, što jon krainie nie patrebny, nabiaryciesia mužnaści i skažycie pra heta. Nam čarhovaja svabodnaja ekanamičnaja zona nie patrebna - patrebny supiersučasnyja vytvorčaści, fabryki, zavody, dzie buduć vyrablać zapatrabavanuju ŭ śviecie pradukcyju, samyja pieradavyja pradpryjemstvy. Nie patrebny navat rabočyja miescy, jak my pryvykli havaryć, u nas usie ludzi pracaŭładkavany, naadvarot, rabočych ruk nie chapaje». Patrebny vysokapradukcyjnyja rabočyja miescy. Dla taho, kab stvaryć takuju vytvorčaść u Biełarusi, ličyć Prezident, jość usio. «I samaje hałoŭnaje - čałaviek i stabilnaść u dziaržavie, jakoj siońnia nie chapaje mnohim dziaržavam. Inviestary šukajuć, jak jany kažuć, cichuju havań, kab raźmiaścić svaje kapitały, pradpryjemstvy, spakojna pracavać, vypuskać patrebnuju pradukcyju», - padkreśliŭ Alaksandr Łukašenka.-0-
Kamientary