Uhoda miž Janukovičam i apazicyjaj — poŭny tekst

Zaniepakojenyja trahičnymi vypadkami straty žyćciaŭ va Ukrainie,

Imknučysia nieadkładna spynić kryvapralićcie,

Rašuča nastrojenyja prakłaści šlach da palityčnaha ŭrehulavańnia kryzisu,

My, baki, nižejpadpisanyja, damovilisia ab nastupnym:

1. Na praciahu 48 hadzin paśla padpisańnia hetaha pahadnieńnia budzie pryniaty, padpisany i apublikavany śpiecyjalny zakon, jaki adnović dziejańnie Kanstytucyi Ukrainy 2004 hoda sa źmienami, uniesienymi da hetaha času. Padpisanty zajaŭlajuć pra namier stvaryć kaalicyju i sfarmavać urad nacyjanalnaha adzinstva na praciahu 10 dzion paśla hetaha.

2. Kanstytucyjnaja reforma, jakaja budzie ŭraŭnavažvać paŭnamoctvy prezidenta, urada i parłamienta, budzie pačataja nieadkładna i zavieršana ŭ vieraśni 2014 hoda.

3. Prezidenckija vybary buduć praviedzieny adrazu paśla pryniaćcia novaj Kanstytucyi Ukrainy, ale nie paźniej za śniežań 2014 hoda. Budzie pryniataje novaje vybarčaje zakanadaŭstva, a taksama sfarmavany novy skład Centralnaj vybarčaj kamisii na praparcyjnaj asnovie ŭ adpaviednaści z praviłami ABSIE i Vieniecyjanskaj kamisii.

4. Rasśledavańnie niadaŭnich aktaŭ hvałtu budzie praviedzienaje pad ahulnym manitorynham ułady, apazicyi i rady Jeŭropy.

5. Ułada nie budzie ŭvodzić nadzvyčajnaje stanovišča. Ułada i apazicyja ŭstrymajucca ad prymianieńnia siłavych mier.

Viarchoŭnaja Rada Ukrainy prymie treci zakon ab vyzvaleńni ad adkaznaści, jaki budzie raspaŭsiudžvacca na tyja ž pravaparušeńni, što i zakon ad 17 lutaha 2014 hoda.

Abodva baki buduć prykładać surjoznyja namahańni dla narmalizacyi žyćcia ŭ haradach i vioskach šlacham vyzvaleńnia administracyjnych i hramadskich budynkaŭ i razbłakavańnia vulic, skvieraŭ i płoščaŭ.

Niezakonnaja zbroja pavinna być zdadzienaja ŭ orhany Ministerstva ŭnutranych spraŭ Ukrainy na praciahu 24 hadzin z momantu ŭstupleńnia ŭ siłu vyšejzhadanaha śpiecyjalnaha zakonu ( p.1 hetaha Pahadnieńnia).

Paśla nazvanaha pieryjadu ŭsie vypadki niezakonnaha našeńnia i zachoŭvańnia zbroi buduć padpadać pad dziejnaje zakanadaŭstva Ukrainy. Siły apazicyi i ŭłady adyduć ad pazicyj supraćstajańnia. Ułada budzie vykarystoŭvać siły pravaparadku vyklučna dla fizičnaj abarony budynkaŭ orhanaŭ ułady.

6. Ministry zamiežnych spraŭ Francyi, Hiermanii, Polščy i Śpiecyjalny pradstaŭnik prezidenta Rasijskaj Fiederacyi zaklikajuć da nieadkładnaha spynieńnia ŭsich vidaŭ hvałtu i supraćstajańnia.

h. Kijeŭ, 21 lutaha 2014 hoda

Ad ułady:

prezident Ukrainy Viktar Janukovič

Ad apazicyi:

lidar partyi UDAR Vital Kličko,

lidar VA « Baćkaŭščyna « Arsienij Jacaniuk,

lidar VA «Svaboda « Aleh Ciahnibok

Zaśviedčyli:

Ad Jeŭrapiejskaha Sajuza: Fiederalny ministr zamiežnych spraŭ Fiederatyŭnaj Respubliki Hiermanija Frank-Valter Štajnmajer, ministr zamiežnych spraŭ Respubliki Polšča Radasłaŭ Sikorski i kiraŭnik departamienta kantynientalnaj Jeŭropy Ministerstva zamiežnych spraŭ Francuzskaj Respubliki Eryk Furńje.

Pavialičyć

• 0
• 0
• 0
• 0
• 0
• 0
• 0
• 0