U Breście dziaŭčyna pabačyła aryjenciroŭku na źnikłaha čałavieka — i znajšła jaho za paru chvilin
Pažyły mužčyna 5 hadzin išoŭ uzdoŭž darohi da horada. Rolik ź niečakanaj znachodkaj zalacieŭ u tyktoku — ludzi ŭražanyja ŭvažlivaściu i nieabyjakavaściu dziaŭčyny.
Maryja Kananovič žyvie ŭ Breście, u mikrarajonie Vulka. Razam z mužam trymaje biznes pa prodažy miodu i ŭsiaho ŭsiakaha z ułasnych pčalnikoŭ. Dniami ŭ svaim tyktoku dziaŭčyna apublikavała videa, u jakim jana pa ščaślivaj vypadkovaści sustreła na darozie mužčynu, pra źniknieńnie jakoha daviedałasia za piać chvilin da taho.
Jak tłumačyć Maryja ŭ apisańni videa, jana ŭ toj momant nie pavinna była być u Breście i nie pavinna była trapić na paviedamleńnie pra źniknieńnie čałavieka.
Ale tak skłałasia, što jana nie tolki apynułasia ŭ patrebny čas u patrebnym miescy, ale jašče zdoleła ŭ pryciemkach apaznać na ŭzbočynie darohi pažyłoha mužčynu z aryjenciroŭki.
«Ja adrazu nie mahła pavieryć u heta, chvilinu padumała, vyrašyła raźviarnucca i pajechać za im», — dzielicca Maryja.
Dziaŭčyna spyniła mašynu kala mužčyny i spytała, ci nie z Radvaničaŭ jon i ci nie jaho šukajuć svajaki. Mužčyna paćvierdziŭ, što jon z hetaj vioski. Jon vyhladaŭ razhublenym, ale sieŭ u mašynu da Maryi, jakaja viarnuła jaho dadomu.
Jak akazałasia, mužčyna piać hadzin išoŭ pieššu z Małych Radvaničaŭ da Bresta. Za hety čas jon prajšoŭ bolš za 16 km praź lasy, pali i inšyja vioski, dajšoŭšy da skryžavańnia vulic Žuravieckaj i Cianistaj u bresckim rajonie Puhačoŭka, jak možna apaznać miascovaść pa kadrach ź videa.
Kali dziaŭčyna znajšła mužčynu, sonca ŭžo sieła. Unačy stary čałaviek moh by trapić u niebiaśpiečnuju situacyju ci paprostu zamierznuć.
Videa ŭžo sabrała bolš za 2,6 miljona prahladaŭ. Ludzi dziakujuć Maryi za nieabyjakavaść i zachaplajucca jaje niezvyčajnaj uvažlivaściu:
«Dziakuj za nieabyjakavaść… Demiencyja — heta strašna».
«Jak vy tvary zapaminajecie, ja pakul razoŭ piać z čałaviekam nie parazmaŭlaju, navat blizka tvaru nie zapomniu!»
«Ja pieršy raz baču, kab źnikłaha čałavieka znajšli z abjavy, ich ža miljony źnikajuć».
«Hetaj dziaŭčynie ja zabraniravała miesca ŭ rai».
«Mnie zdajecca biełarusy — heta štości na aniolskaj, ja nie baču naohuł drennych učynkaŭ i rolikaŭ ludziej hetaj nacyjanalnaści», — pišuć kamientatary.
«Kali b było bolš takich uvažlivych ludziej jak vy, paviedamleńniaŭ «znojdzieny — žyvy» było b bolš», — dadaje vałanciorka, jakaja zajmajecca pošukam źnikłych ludziej.
Niekatoryja ludzi ŭ kamientarach pryhadvali, što ich svajakam z demiencyjaj taksama zaŭsiody kudyści treba iści i jany zaŭsiody ciahajuć z saboj niejkija kłunki. Kamuści viarnuć źnikłych svajakoŭ dapamahali takija ž, jak Maryja, nieabyjakavyja ludzi.
Heta nie pieršy raz, kali Maryja dapamahaje starym. Uletku 2024 hoda jana padviezła 93-hadovuju babulu, jakaja niekalki hadzin išła ź vioski ŭ horad. Žančyna rasčuliła ludziej svajoj ščyraj padziakaj za dapamohu.
«Naša Niva» — bastyjon biełaruščyny
PADTRYMAĆCiapier čytajuć
«Adpraŭlali myć tualety i kidali ŭ ŠIZA». Susiedki raskazali pra abychodžańnie ŭ kałonii z eks-palitźniavolenaj Tamaraj Karavaj, jakaja paśla pamierła33
Kamientary