Ukraina atrymała druhi paśla «Aranžavaj revalucyi» šaniec na rašučyja źmieny da lepšaha. Ale biez surjoznych reformaŭ jana moža zmarnavać i hetuju mahčymaść.
Chto pamiataje «Aranžavuju revalucyju» 2004 hoda, toj moža sabie dazvolić tolki strymanuju eŭfaryju ad apošnich padziejaŭ va Ŭkrainie.
Usio heta ŭžo było, chaj i ŭ biaskroŭnaj formie: i šmattydniovaje procistajańnie na Majdanie Niezaležnaści, i napružanyja pieramovy, i pieramoha prahresiŭnych siłaŭ nad siłami saviecka-aliharchičnaj inercyi.
I ŭžo tady Ŭkraina naradziła ŭ susiednich aŭtarytarnych krainach spadziavańni, što jana zmoža zrabicca prykładam i dla ich. Što Kijeŭ zmoža zrabicca alternatyŭnym Kramlu centram siły na postsavieckaj prastory i placdarmam dla demakratyčnych pieraŭtvareńniaŭ i ŭ nas.
Hetaha nia stałasia.
Prezydent Juščanka atrymaŭ mandat na praviadzieńnie rašučych reformaŭ, ale ŭ historyju ŭvajšoŭ chiba prysudžeńniem tytuła Hieroja Ŭkrainy Stepanu Banderu.
U adroźnieńnie ad Juščanki, hruzinski prezydent Saakašvili, jaki pryjšoŭ da ŭłady ŭ vyniku «Revalucyi ružaŭ» na hod raniej, hetkim mandatam skarystaŭsia i zdoleŭ radykalna madernizavać hruzinski dziaržaŭny ład. U vyniku reformaŭ Saakašvili kraina zrabiła surjozny skačok u svaim raźvićci.
Ciapier Ukraina atrymała druhi taki ž šaniec. Jaki jana moža zmarnavać i hetym razam
- asabliva zvažajučy na toje, što adnoj ź pieršych mieraŭ novaje ŭłady było kasavańnie biaskryŭdnaha zakona pra rehijanalnyja movy.
Prykład Hruzii pakazvaje, što hałoŭnyja reformy pavinny palahać u liberalizacyi ekanamičnaha zakonadaŭstva. U stvareńni prostych i prazrystych praviłaŭ hulni ŭ ekanomicy i źmiežnych sferach žyćcia.
Mienavita heta zaŭždy jość hałoŭnaj antykarupcyjnaj mieraju, a nie trasieńnie kułakami ci pakazalny teror suprać adzinkavych złoŭžyvalnikaŭ.
I mienavita hetkaje ahulnaje azdaraŭleńnie dziaržavy jość kudy bolš važnaj zadačaj dla Ŭkrainy, čym intehracyja z Eŭrapiejskim Źviazam.
Kab pieramahčy karupcyju, hetuju fundamentalnuju chvarobu ŭsich postsavieckich dziaržavaŭ, treba źniščyć jaje korań.
Dla hetaha treba źmienšyć samu pa sabie kolkaść sytuacyj, dzie čynoŭnik prymaje toje ci inšaje rašeńnie (naprykład, vydaje dazvoł ci licenziju) albo raźmiarkoŭvaje dziaržaŭnyja hrošy.
Plus, dziaržava pavinna dać maksymalnaje «zialonaje śviatło» małomu i siaredniamu pradprymalnictvu: źnizić padatki, spraścić administratyŭnyja ŭmovy viadzieńnia biznesa.
Heta tolki na pieršy pohlad nudnaja ekanamičnaja miera. Nasamreč tolki drobnyja i siarednija pryvatniki zdolnyja stvaryć doŭhaterminovuju bazu padtrymki i dla sapraŭdy adkaznych palitykaŭ.
Kudy paviadzie Ŭkrainu jaje novaje kiraŭnictva, asabliva kali pasadu prezydenta zojmie najbolš vierahodny pretendent na hetuju pasadu — Julija Tymašenka?
Całkam vierahodna, što Tymašenka paśla turmy i sa zdolnym da ŭzbrojenaha supracivu «Pravym sektaram» pierad vačyma — heta nie Tymašenka ŭzoru 2004 i navat 2010 hoda.
Ale nakolki mocnyja pieramieny adbylisia ź joju i nakolki jana vyrakłasia svaich zastarełych aliharchičnych i leva-papulisckich zvyčak — vialikaje pytańnie, nakont jakoha nia varta być nadta aptymistyčnymi. I heta praciahvaje vyklikać niepakoj. Jak i toje, što, padobna, kiravać Ukrainaj tak i praciahnuć pradstaŭniki staroj palityčnaj elity, padčas Majdana ŭvasoblenyja ŭ trojcy Jacaniuk — Kličko — Ciahnybok.
«Piensijanieram dzieci pieraškadžajuć!» U Breście nie pieršy miesiac iduć sprečki nakont miesca dla budaŭnictva dziciačaha sada5
Kamientary