300 tysiač za «kamunałku» ŭ vializnym katedžy: repartaž z adzinaha ŭ Biełarusi multykamfortnaha doma
Pieršy pryvatny multykamfortny dom prajšoŭ vyprabavańnie zimovymi marazami. «NN» pabyvała va ŭnikalnym budynku.
Multykamfortny dom u Dziaržynsku.
Multykamfortny dom — kancepcyja pabudoŭ, raspracavanaja kancernam «Sen-Haben», vytvorcam budaŭničych materyjałaŭ ź Jeŭrasajuza.
Asnovaj dla multykamfortnaha doma staŭ «pasiŭny» dom — raspracavanaje ŭ pačatku 1990-ch hadoŭ u Hiermanii žyllo ź minimalnym spažyvańniem enierhii. Adnak u multykamfortnym domie da ekanamičnaści dadalisia i inšyja składniki.
U azdableńni doma architektar Alaksandr Kurčavy vykarystaŭvaŭ biełaruskija narodnyja arnamienty.
Ideju multykamfortnaha doma raspracavaŭ 4 hady tamu architektar Alaksandr Kučaravy, a pabudavać piłotny katedž płoščaj 188 kv.m. u Dziaržynsku vyrašyŭ Alaksiej Tarnahurski. Da jaho dałučyŭsia «Sen-Haben», biełaruskaja arhanizacyja Centr ekałahičnych rašeńniaŭ i kampanija «Vieluks», jakaja raspracoŭvaje i vyrablaje mansardnyja vokny.
Architektar Alaksandr Kučaravy tłumačyć:
«My budujem dom nie dla taho, kab aščadžać rasijskuju naftu i haz, a dla kamfortnaha pražyvańnia. Da jaho adnosicca jakaść pavietra, naturalnaje aśviatleńnie, akustyka doma, biaśpieka i daŭhaviečnaść. Ale i enierhaefiektyŭnaść taksama. Hety paramietr my apryjory vykanali, atrymaŭšy ŭ vyniku dom kłasa «A+» enierhaspažyvańnia, što na dadzieny momant u try razy pieraŭzychodzić biełaruskija budaŭničyja narmatyvy».
Śviežaść pavietra ŭ domie padtrymlivaje kampjutarnaja sistema manitorynhu, jakaja sočyć za ŭsimi pakazčykami ŭnutranaha asiarodździa, u tym liku za ŭtrymańniem vuhlakisłaha hazu. Kali kancentracyja vuhlakisłaha hazu dasiahaje 750 ppm (pramile), dom pravietryvajecca praz aŭtamatyčnyja mansardnyja vokny.
Ustaloŭka sistemy takich voknaŭ robić kandycyjanier niepatrebnym. U multykamfortnym domie vykarystoŭvajecca technałohija «kiravanaj prodźmy», kali aŭtamatyka adčyniaje mansardnyja vokny na paŭnočnym i paŭdniovym baku doma, što efiektyŭna źnižaje tempieraturu ŭnutry pamiaškańniaŭ i prynosić śviežaje pavietra, čaho nie robiać split-sistemy kandycyjanieraŭ.
Uzimku za abahreŭ adkazvaje hazavy kacioł. Dziakujučy zajaŭlenaj raspracoŭščykami amal absalutnaj hiermietyčnaści pamiaškańnia za try miesiacy aciapleńnia (praŭda, zima była vyklučna miakkaja) domu Tarnahurskaha spatrebiłasia ŭsiaho 600 kubamietraŭ hazu dla aciapleńnia, u toj čas jak zvyčajnamu domu anałahičnaj płoščy nieabchodna kala tysiačy kubamietraŭ hazu. Uładalnik kaža, što tempieratura ścienaŭ doma adroźnivajecca ad tempieratury pavietra tolki na adzin hradus.
Taksama ŭzimku pracuje sistema rekupieracyi pavietra. Śpiecyjalnaja ŭstanoŭka zabiraje śviežaje chałodnaje pavietra zvonku, adnak pierad padačaj u žyłyja pakoi chałodnaje pavietra nahrajecca adpracavanym ciopłym pavietram z doma, ale dva pavietranyja patoki nie źmiešvajucca.
«My pastavili biełaruskuju sistemu rekupieracyi i vielmi zadavolenyja vynikam. Pry vonkavaj tempieratury minus 25 hradusaŭ i tempieratury plus 24 hradusy ŭnutry pravietra prahrajecca ŭstanoŭkaj rekupieracyi da plus 22 hradusaŭ», — dzielicca nazirańniami Alaksiej.
Uładalnik śćviardžaje, što za «kamunałku» ŭ svaim katedžy ŭ zimovy pieryjad jon płaciŭ 22 jeŭra — prykładna ŭ stolki abychodzicca ŭtrymańnie zvyčajnaj dvuchpakajovaj kvatery.
«Važnaj zadačaj była aryjentacyja pabudovy ŭ prastory, — tłumačyć Kučaravy. — Hety dom funkcyjanalna aryjentavany na čatyry baki śvietu. Paŭdniovy bok zajmaje samy vialiki pakoj, dzie siamja bavić najbolš času, — haścioŭnia. Praź vializnaje akno ŭ dom pranikaje soniečnaje śviatło. Uletku ad jaho abaraniajuć ralety, a ŭzimku jano robić bujny ŭniosak u aciapleńnie doma. Kab jašče susied Uładzimira pabudavaŭ toje, što ŭzhadniŭ z čynoŭnikami, insalacyja haścioŭni była b bolšaj.
Na paŭnočnym boku raźmieščany techničnyja pakoi i pakoi karotkačasovaha prybyvańnia — sanvuzły, harderobnyja. Jany stvarajuć bufiernuju zonu. Pa ŭschodnim i zachodnim bakach raźmieščanyja spalni».
Dziciačy pakoj.
Vysokaja 9-mietrovaja stol haścioŭni ababitaja hukaizalacyjnymi plitami, tamu ŭ pakoi niama recha.
Kanstrukcyja katedža davoli prostaja. Heta draŭlany karkasny dom, pryčym drevy dla belek kuplali ŭ najbližejšym lashasie. Adnak dla azdableńnia vykarystoŭvalisia najnoŭšyja materyjały i technałohii. Multykamfortny dom uciepleny najnoŭšaj, ekałahična čystaj i biaśpiečnaj dla čałavieka škłavataj — jaje vałokny mohuć raskładacca arhanizmam i vyvodzicca ź jaho. Taksama ŭ hetaj škłavacie pamienšana ŭtrymańnie farmaldehidu. Pry budaŭnictvie vykarystoŭvalisia admysłovyja klimatyčnyja miembrany, a sam dom prachodziŭ test pavyšanym unutranym ciskam, kab vyjavić niehiermietyčnyja miescy.
Dom jašče nie dabudavany całkam — adsutničajuć niekatoryja elemienty ŭnutranaha dekoru. Kiravańnie sistemami doma taksama pakul pracuje u paŭaŭtamatyčnym režymie: infarmacyja vyvodzicca na manitory, ale adčyniać i začyniać vokny i ralety pakul davodzicca pultami. Nieŭzabavie ŭsie sistemy padłučać da kampjutara, i jany stanuć całkam aŭtanomnyja.
Ale ŭ płanach Alaksieja zrabić svoj dom aktyŭnym: pastavić na dachu vodanahravalnyja i vadasbornyja elemienty, bo pavodle padlikaŭ architektara, vady, sabranaj z dachu, chopić na zabieśpiačeńnie doma. Zachoŭvać vadu možna budzie ŭ padziemnym reziervuary.
Soniečnyja fotaelemienty i viatrak zabiaśpiečać dom elektryčnaściu. Bolš za toje, elektraenierhiju možna budzie pradavać i zarablać na hetym hrošy. Z hetym pakul prablemy: Alaksandr Kučaravy kaža, što Minenierha nie haryć žadańniem kuplać lišniuju elektryčnaść u nasielnictva, choć i abaviazana. Architektar spadziajecca, što nieŭzabavie situacyja vypravicca, i tady dom zmoža prynosić prybytak da 500 jeŭra ŭ hod.
Uvohule, budaŭnictva multykamfortnaha doma «pad kluč» kaštavała 2000 dalaraŭ za kvadratny mietr. Alaksiej Tarnahurski ŭpeŭnieny, što takija damy biełarusy zmohuć pabudavać sabie navat za mienšyja hrošy.
Sprava ŭ tym, što na svaim domie Alaksiej «abkatvaŭ» kanstruktavańnie i budaŭnictva padobnych damoŭ. Alaksiej Tarnahurski vałodaje kampanijaj «Sučasny karkasny dom» i ciapier zajmajecca raspracoŭkaj modulnych multykamfortnych damoŭ.
Prajekt multykamfortnaha doma ŭ Dziaržynsku atrymaŭ uznaharodu kampanii ISOVER za enierhaefiektyŭnaść.
«Minimalnaja płošča modulnaha doma — 40 kv.m. My ŭziali jaje, bo ličym takuju płošču minimumam dla kamfortnaha pražyvańnia. Dalej zamoŭca zmoža kampanavać hatovyja raspracavanyja moduli. Moduli buduć vyrablacca ciaham niekalkich miesiacaŭ, a źbiracca ciaham niekalkich dzion. Pry hetym dom budzie vałodać usimi rysami multykamfortnaha pasiŭnaha doma z kłasam enierhaspažyvańnia «A»», — kaža jon.
Pavodle Tarnahurskaha, aryjentoŭny košt budaŭnictva takoha doma «pad kluč» składzie 1500 dalaraŭ za kvadratny mietr.
Kaniečnie, pry siońniašnich cenach na kamunałku pakul vyhadniej budavać biez navarotaŭ. Na siońnia cana budaŭnictva indyvidualnaha składaje ad 500 da 1200 dalaraŭ za kvadrat «pad kluč» u zaležnaści ad materyjałaŭ. Dapuścim, płošča doma składaje 150 kvadrataŭ. Tady navat ekanomija na kamunałcy 1000 dalaraŭ za hod za 50 hadoŭ nie kampiensuje lišnich vytrat na budaŭnictva. Adnak situacyja moža źmianiccca, kali ceny na haz i elektryčnaść jašče vyrastuć. Dyj mahčymaść adčuć svajo žytło enierhadastatkovym pryjemnaja dla mnohich haspadaroŭ.
Kamientary