Rada Jeŭropy znoŭ zaklikaje Biełaruś uvieści maratoryj na śmiarotnuju karu
Hienieralny sakratar Rady Jeŭropy Turbjorn Jahłand vykazaŭ zaniepakojenaść u suviazi ź infarmacyjaj ab pryviadzieńni ŭ vykanańnie ŭžo druhoha sioleta śmiarotnaha prysudu ŭ Biełarusi. Adpaviednuju zajavu Jahłanda raspaŭsiudziła siońnia pres-słužba Rady Jeŭropy.
«Ja zaklikaju Biełaruś uvieści maratoryj na śmiarotnuju karu jak pieršy krok na šlachu da jaje poŭnaj admieny. Heta stała b važnym krokam na šlachu nabližeńnia Biełarusi da Rady Jeŭropy i jaho kaštoŭnaściaŭ», — zajaviŭ hienieralny sakratar RIE.
Z sumiesnaj zajavaj nakont čarhovaj kary ŭ Biełarusi vystupili taksama dakładčyk pa admienie śmiarotnaj kary Parłamienckaj asamblei Rady Jeŭropy Maryjeta Karamandzi i niadaŭna pryznačany dakładčykam PASIE pa situacyi ŭ Biełarusi Andrea Ryhoni.
«Usie namahańni Biełarusi nablizicca da PARIE buduć zastavacca marnymi, pakul śmiarotnaja kara budzie prymianiacca da hramadzian Biełarusi, — cytuje zajavu pres-słužba Rady Jeŭropy. — Zabojstva i śmiarotnaja kara nikoli nie ŭraŭnavažać adzin adnaho. Kali dziaržava sama zabivaje, pryncyp «vy nie pavinny zabivać» hublaje svoj absalutny status, pakolki padryvajucca asnoŭnyja pravy čałavieka».
Niekalkimi dniami raniej z čarhovymi zaklikami da biełaruskich uładaŭ admianić śmiarotnuju karu vystupili taksama Jeŭrasajuz i pravaabarončaja arhanizacyja «Mižnarodnaja amnistyja».
Kamientary