Papularnaja teoryja kaža, što ŭ 1920-ch vytvorcy elektryčnych lampaŭ damovilisia abmiežavać termin słužby bytavych lampaŭ napalvańnia tysiačaj hadzin, kab zabiaśpiečyć pastajannyja prodažy.
Teoryja zastajecca niepaćvierdžanaj, ale budučyni ŭ lampačak napalvańnia niama — heta fakt. Lampy napalvańnia jašče vielmi papularnyja ŭ Biełarusi ź jaje adnosna tannaj elektryčnaściu. Nasamreč, hetaja pryłada pieratvaraje ŭ bačnaje śviatło ažno 5% spažytaj enierhii. Astatnija 95% — infračyrvonaje, ci ciepłavoje, vypramieńvańnie. Niezdarma mnohija krainy (Biełaruś nie ŭ ich liku) abvieścili vajnu takim lampam i častkova ci całkam zabaranili ich užyvańnie.
Enierhaaščadnyja luminiescentnyja lampy akazalisia nie najlepšaj alternatyvaj.
Jany pracujuć daŭžej za lampy napalvańnia i spažyvajuć mienš elektryčnaści. Na žal, luminiescentnyja lampy niasuć pahrozu dla zdaroŭja čałavieka, bo ŭ ich utrymlivajecca nadzvyčaj atrutnaja rtuć. Tamu rastruščanaja luminiescentnaja lampa — zusim nie da ščaścia, a pravilna ŭtylizavać takuju lampu ŭ Biełarusi — sapraŭdnaja prablema.
Adnak isnuje typ bytavych lampačak, u jakich amal niama niedachopaŭ. Heta śviatłodyjodnyja lampy.
Krynicaj śviatła ŭ śviatłodyjodnaj lampie źjaŭlajecca adzin, ale čaściej niekalki, śviatłodyjodaŭ. Śviatłodyjodnyja lampy adroźnivajucca ad lampaŭ napalvańnia i luminiescentnych lampaŭ nadzvyčaj małym spažyvańniem elektraenierhii. Kožny vat śviatłodyjodnaj lampy pryblizna ekvivalentny 10 vatam lampy napalvańnia. Takim čynam, šaścivatnaja lampačka na śviatłodyjodach zamianiaje 60-vatnuju lampu napalvańnia.
Mocnym bokam śviatłodyjodnych lampaŭ jość nie tolki vysokaja śvietłavaja addača, ale i termin słužby.
Kali lampačka napalvańnia «haryć» kala 1000 hadzin, luminiescentnaja lampačka — da 15 tysiačaŭ hadzin, dyk termin słužby śviatłodyjodaŭ u bytavoj lampačcy składaje kala 35—50 tysiačaŭ hadzin.
Tearetyčna, adnoj śviatłodyjodnaj lampy, zapalenaj ciaham 6 hadzin u dzień, chopić na 16—22 hady.
Dadatkovym plusam bytavych śviatłodyjodnych lampačak pierad luminiescentnymi źjaŭlajecca bolš płaŭny i pryjemny voku kalarovy śpiektr śviatła.
Kolki ekanomić śviatłodyjod?
Adna 60-vatnaja lampa napalvańnia, uklučanaja 6 hadzin u dzień, raschoduje 11 kVt·h. Pry canie 1 kVt·h 746 rubloŭ (dla damoŭ biez elektraplit i biez užyvańnia pavieličalnaha kaeficyjenta) štomiesiac takaja lampa abychodzicca ŭ 8,2 tys. rub. Hod ekspłuatacyi lampy napalvańnia kaštuje 98,4 tys. rub.
Šaścihadzinnaja štodzionnaja eskpłuatacyja 7-vatnaj śviatłodyjodnaj lampački kaštuje 670 rubloŭ u miesiac i 11,6 tys. rub u hod. Tamu takaja lampačka akupicca ŭsiaho za hod.
Cana na śviatłodyjodnyja lampy zaležyć ad mahutnaści, vytvorcy, terminu harantyi.
Adnak samaja papularnaja prapanova — 67-vatnyja anałahi 60vatnych lampačak napalvańnia. Takuju lampačku možna nabyć prykładna za 90 tysiačaŭ rubloŭ. Tamu pakupniki addajuć pieravahu bolš tannym i taksama davoli ekanamičnym luminiescentnym lampačkam ci lampam napalvańnia. Adnak treba zaŭvažyć, što śviatłodyjodnaja lampa chutčej za ŭsio pieražyvie jašče nie adno pavyšeńnie taryfaŭ.
Ciapier čytajuć
«Ja chaču spraviadlivaści — i dla žančyn, i dla siabie». Ščyraja hutarka z Andrejem Stryžakom pra skandał z dykpikami, zaležnaści i budučyniu27
Kamientary