Pamior samy stary mužčyna ŭ śviecie, jon byŭ rodam z Polščy, a žonka — ź Biełarusi
U ZŠA na 112-m hodzie žyćcia pamior žychar Ńju-Jorka, jaki ličyŭsia najstarejšym mužčynam u śviecie. Alaksandr Imič (Imich) atrymaŭ heta zvańnie ŭ krasaviku.
Imič naradziŭsia ŭ Polščy, u Čenstachovie, 4 lutaha 1903 hoda ŭ jaŭrejskaj siamji. Jon navat školnikam paŭdzielničaŭ u vajnie z balšavikami.
U 1936 h. Imič paŭtorna ažaniŭsia, jaho žonku zvali Viele Kacelenbohien, jana była z Šarašova (siońnia — Pružanski rajon). Paśla pačatku Druhoj suśvietnaj vajny niekatory čas siamja žyła ŭ Biełastoku, a potym saviety ŭ 1940 h. vysiesili ich u Archanhielskuju vobłaść u papraŭčy łahier. Imičy vyzvalilisia pa amnistyi ŭ 1941 h. i ŭsiu vajnu praviali ŭ Samarkandzie, adkul u 1947 h. repatryjavalisia ŭ Polšču, potym vyjechali ŭ Francyju, a zatym u ZŠA.
U ZŠA Imič znoŭ zaniaŭsia parapsichałohijaj, jakoj cikaviŭsia ŭ 1920-ch.
Na pytańnie ab sakrecie daŭhalećcia Imič niejak skazaŭ, što paniaćcia nie maje, jak tak atrymałasia, što jon nie pamior raniej. Žonka amierykanca pamierła ŭ 1986 hodzie.
Jak raspaviadaŭ doŭhažychar, mahčyma, svaim stanam zdaroŭja jon abaviazany pravilnamu charčavańniu. U racyjonie amierykanca byli ŭ asnoŭnym stravy z kurycy i ryby, jon nie ŭžyvaŭ ałkahol, a ŭ maładości zajmaŭsia sportam — himnastykaj i płavańniem.
Choć Alaksandr Imič ličyŭsia samym starym mužčynam, pa ŭzroście jaho ŭ ciapierašni čas abychodziać 66 žančyn. Najstarejšym čałaviekam na płaniecie źjaŭlajecca 116-hadovaja japonka Misaa Akava.
Kamientary