Pa-biełarusku źjaviłasia čarhovaja kniha finskaj piśmieńnicy Tuve Jansan, stohadovy jubilej jakoj sioleta šyroka śviatkujecca va ŭsim śviecie. Ciapier prychilniki mumitrolaŭ dy inšych žycharoŭ Mumidoła i jaho vakolicaŭ mohuć papoŭnić svaje kalekcyi mumiknih novym vydańniem, što vyjšła ŭ pierakładzie Alesi Bašarymavaj u vydaviectvie Źmitra Kołasa. Heta kniha «Niebiaśpiečnaje leta», dzie hieroi vymušanyja raźvitacca ź bieskłapotnaściu žyćcia ŭ Mumidole i prymierać na siabie novyja i časam niečakanyja roli.
Ahniadyšnaja hara, što doŭha spała, raptoŭna pračnułasia, i paśla vyviaržeńnia marskija chvali zatapili dalinu. Mumisiamja, prychapiŭšy z saboj Chomsu i Misu, jakija taksama zastalisia biez dachu nad hałavoj, ratujecca ŭ dziŭnym płyvučym domie, dzie raz-poraz hrymiać navalnicy, chacia znadvorku spakojna, dzie dźviery i leśvicy nikudy nie viaduć, u kładoŭcy poŭna niejadomaj ježy, a z kuta čujecca čyjści kplivy śmiech. U dadatak da ŭsiaho, u kupalskuju noč niekatoryja z novych nasielnikaŭ hetaha tajamničaha doma prosta źnikajuć, a chtości navat traplaje ŭ viaźnicu…
Słovam, leta robicca sapraŭdy niebiaśpiečnym. Navat Snusmumryk, jaki zatrymaŭsia pa adnoj važnaj i nieadkładnaj spravie ŭ svaim padarožžy i ŭvohule nie śniŭ i nie bačyŭ, što ŭ Mumidole zdaryŭsia patop, nie zmoh paźbiehnuć katastrofy, moža być, jašče bolšaj: volnalubivy vandroŭnik zrabiŭsia šmatdzietnym tatam!
Hetaja kniha poŭnaja niečakanych kalizij, kupalskich varožbaŭ, raptoŭnych rasstańniaŭ i ščaślivych sustreč, a jašče chiemuloŭ i vožykaŭ.
Nabyć jaje možna ŭ kniharniach «Biełknihi», a nieŭzabavie i ŭ «Akademknizie».
Ciapier čytajuć
U Tajłandzie źnikła anlifanščyca ź Pinska. Jaje mahli pradać u Mjanmu5
Kamientary