Kitajski miljarder vyrašyŭ ździvić biedniakoŭ z ZŠA svajoj ščodraściu. Čeń Huanbiao raźmiaściŭ u bujnych amierykanskich ŚMI abjavy, u jakich zaprasiŭ tysiaču biednych žycharoŭ Ńju-Jorka na dabračynnuju viačeru, jakaja projdzie ŭ Centralnym parku miehapolisa.
Pry hetym miljarder paabiacaŭ nie tolki nakarmić zaprošanych haściej, ale vydać im hrošaj — kožnamu zaprošanamu vydaduć kanviert z $300. U nahruzku da hrašovaha padarunku prykładajecca pieśnia We Are The World, jakuju vykanaje sam dzivak-miljarder.
Svaim učynkam miljarder choča źmianić mierkavańnie amierykancaŭ pra kitajskich ludziej, jakija zarabili šmat hrošaj, a taksama prademanstravać śvietu prykład ščodraści. Jak raspavioŭ sam dabradziej, praviadzieńnie mierapryjemstva budzie kaštavać jamu prykładna $1 młn.
Dabračynnaja akcyja adbudziecca 25 červienia. Na siońnia zaprašeńnie na viačeru «niečuvanaj ščodraści» pryniali 250 čałaviek.
Čeń Huanbiao — bujny kitajski biźniesmien, jakomu naležyć firma pa znosie sastarełaha žylla. Adnak prasłaviŭsia žychar Padniabiesnaj nie dziakujučy svaim pośpiecham u biznesie, a svaimi dabračynnymi ŭčynkami. Uvieś śviet daviedaŭsia pra Huanbiao paśla ziemlatrusu ŭ kitajskaj pravincyi Syčuań — miljarder biaspłatna pieradaŭ vyratavalnikam nieabchodnaje abstalavańnie, prybyŭ na miesca trahiedyi, udzielničaŭ u razbory zavałaŭ i vyratavaŭ 13 čałaviek. U Štatach ab im daviedalisia taksama paśla sproby Čeń Huanbiao nabyć The New York Times. Kupla nie ŭdałasia, zatoje zaraz kitajec płanuje kupić adzin z raździełaŭ u hetym vydańni.
Kamientary