Basiłašvili pra padziei va Ukrainie: Rasija ciapier maje voraha na ŭsie stahodździ

Rasijski akcior teatra i kino Aleh Basiłašvili vykazaŭsia pra padziei va Ukrainie. Artyst asudziŭ dziejańni terarystaŭ i ruskich najmitaŭ na paŭdniovym ŭschodzie krainy i zaklikaŭ rasiejcaŭ zajmacca ŭnutranymi spravami, a nia zachopam čužych terytoryj.

Svaju hramadzianskuju pazicyju Basiłašvili ahučyŭ u intervju vydańniu «Rosbałt».

«Što tyčycca siońniašniaj vajny na Ukrainie — ščyra kažučy, ja nie vielmi razumieju, što tam adbyvajecca i čamu. Chto ad kaho što abaraniaje? Dumaju, nam nie paviedamlajuć ŭsioj praŭdy pra heta. A kali nie paviedamlajuć, značyć, niešta my robim nie zusim pravilnaje», — pačaŭ akcior.

Pavodle jaho słoŭ, jon nie razumieje, za što viaduć baraćbu apałčency na Danbasie i Łuhanščynie i hinuć mirnyja ludzi.

«Hetych miarzotnikaŭ, chto b jany ni byli, jakija spravakavali vajennyja dziejańni, rana ci pozna buduć sudzić sudom usich narodaŭ», — upeŭnieny Basiłašvili.

Jon nie staŭ kankretna adkazvać na pytańnie, kaho jon maje na ŭvazie pad «hniusami»:

«Ja nie viedaju. Chtości ŭ hetym zacikaŭleny! Kamuści treba, kab hinuła hramadzianskaje nasielnictva, a na paŭdniovym uschodzie Ukrainy była kryvavaja rana».

«Kamu patrebna čužaja kroŭ? I hałoŭnaje, niezrazumieła — u imia čaho? Ja nie razumieju, jakich met damahajucca tak zvanyja paŭstancy. Adździaleńnie ad Ukrainy? Nie. Taho, kab być z Rasiejaj? Taksama nie — jany hetaha patrabavańnia nie vysoŭvajuć. A navat kali b i vyłučali — ci mała chto čaho patrabuje. Fiederalizacyi? Dy jana im harantavanaja. Niejkich źmienaŭ u Kanstytucyju? Na heta ŭ Kijevie taksama ŭžo zhodnyja. Čamu ž hetyja ludzi dalej supraciviacca? Moža, chopić adstrelvacca, chłopcy, — za što vy zmahajeciesia? Nie, znoŭ stralajuć…» — dadaŭ akcior.

Basiłašvili nie vieryć, što va Ukrainie da ŭłady pryjšli «fašysty», i zaklikaje rasiejcaŭ zajmacca ŭnutranymi spravami.

Aleh Basiłašvili adznačyŭ, što ŚMI nie danosiać da jaho poŭnuju karcinu taho, što adbyvajecca. U pryvatnaści, jamu nie zrazumieła, čamu na vajnu va Ukrainu iduć niejkija dobraachvotniki z Rasii:

«Jakim čynam jany tudy prychodziać? Jość ža miaža!.. Jana pavinna być na zamku. A tut dziasiatki, sotni dobraachvotnikaŭ sa zbrojaj pierachodziać jaje — i choć by što. Jak heta moža być i što heta za ludzi? A ich najnoŭšaja zbroja? Vy što, možacie sa strałkovaj zbroi źbić viertalot Nie, nie zmožacie, jakaja b jana ni była vydatnaja i dakładnaja. A voś z PZRK — možna. Adkul hetyja PZRK? Tam što, na Danbasie i Łuhanščynie, vielizarnyja składy ŭzbrajeńniaŭ?»

Akcior upeŭnieny, što treba spynić hetuju bojniu.

«Na miescy paŭstancaŭ ja b vyjšaŭ na vysoki pahorak, uziaŭ u ruki zbroju, pakłaŭ jaje na ziamlu i zakryčaŭ: «Bratki, usio. My spyniajem stralbu. Spyniajcie i vy taksama. Davajcie siadziem, pahavorym». A ŭmieńnie naciskać na hašetku i adčuvać seksualnaje zadavalnieńnie ad taho, što ty zabiŭ čałavieka — heta, viedajecie, nie hierojstva, a złačynstva», — adznačyŭ jon.

Nie vieryć Basiłašvili i ŭ «kazki» pra toje, što kali ludzi zdaduć zbroju, to ich «spalać hetak ža, jak u Adesie». A na paprok rasijskaha žurnalista, što «ŭkrainskija vajennyja bambiać i abstrelvajuć z harmat harady, mirnych ludziej», akcior rezka adkazaŭ:

«Jany bambiać nie hramadzianskaje nasielnictva, a tolki tych, chto ź imi zmahajecca, niejkija ŭnutranyja vojski ŭ hetych Danieckaj i Łuhanskaj respublikach. Mirnyja ludzi prosta traplajuć pad ahoń, na vialiki žal… Usio heta vyklikaje ŭ mianie vielmi niepryjemnyja dumki. Navošta nam heta treba? My, dziakujučy dałučeńniu Kryma, zamiest brata i siabra, jaki pobač z nami, užo nabyli lutaha voraha — na ŭsie stahodździ».

Taksama akcior nie ličyć, što va Ŭkrainie da ŭłady pryjšli «fašysty», jak heta padajecca ŭ rasijskich ŚMI.

«Viedajecie, kolki nacyjanalisty tam atrymali na vybarach u Radu? Niejkija mizernyja pracenty. Što ž nam chłusiać z nahody taho, što banderaŭcy ŭziali ŭładu va Ŭkrainie? Voś hetaja chłuśnia mianie i naściarožvaje, tamu što chłuślivy čałaviek, akazvajecca, chłusić ŭ imia niejkich niadobrych metaŭ. Jakich — ja nie viedaju», — rastłumačyŭ jon svaju pazicyju.

Što ž tyčycca situacyi z Krymam, to ŭ Basiłašvili taki pohlad: «Krym — nie cacka: adabraŭ — addaŭ nazad. Narod Krymu — taksama nie cacka. Treba ličycca z tymi, chto žyvie tam».

«Byŭ praviedzieny refierendum, i sapraŭdy, ja ŭ heta vieru, bolšaja častka krymčan vykazalisia za dałučeńnie da RF. Ale ŭjavicie sabie, što Kubań prahałasuje za toje, kab dałučycca da ZŠA. Značyć, Štaty mohuć uvajści tudy i zavałodać Kubańniu? I jak by my nazvali hety akt? Napeŭna, akupacyjaj…» — dadaŭ jon.

«Kali my chočam dapamahčy rasiejcam, jakija pakutujuć va Ukrainie, ad Adesy da Łuhanska — nu što ž, u nas poŭna ziamiel na ŭschodzie krainy, i nie tolki tam. Kali łaska, pryjazdžajcie, a my vam dapamožam, budziecie hramadzianami Rasii. Usio, što zaŭhodna, tolki b samoj Rasiei nie ŭstupać ni ŭ jakija vajennyja kanflikty…» — adznačyŭ akcior.

Naprykancy Aleh Basiłašvili adznačyŭ, što rasiejcam «treba zajmacca nie zachopam novych ziamiel, a ŭnutranym ładam krainy».

Nahadajem, Basiłašvili — adzin ź niamnohich rasijskich artystaŭ, chto padtrymaŭ Ukrainu.

• 0
• 0
• 0
• 0
• 0
• 0
• 0
• 0