«Załaty viek»
Kiejt Błanšet, šaty i dzivosnyja rakursy
Załaty viek (Elizabeth: The Golden Age)
Vialikabrytanija – Francyja, 2007, kalarovy, 114 chv.
Režyser: Šekchar Kapur
Roli vykonvajuć: Kiejt Błanšet, Hordzi Molja, Kłajv Oŭen, Džefry Raš, Samanta Mortan, Ryz Ajfens, Džon Šrapneł
Žanr: Historyka-bijahrafičny film pavodle scenaru Ŭiljama Nikałsana i Majkła Chirsta
Adznaka: 6 (z 10)
Epocha Jelizaviety I. Najmahutniejšaja kraina śvietu Hišpanija maryć skinuć karalevu-hieretyčku, anhielskija piraty rabujuć hišpanskija karabli, a sama karaleva zachaplajecca marskim avanturnikam Ŭołteram Rejli. Žančyna, vajar, karaleva – pryviadzie Anhliju da viaršyniaŭ słavy…
Režyser Šekchar Kapur nanava adkryŭ jelizaviecinskuju temu ŭ kino. Jahonaja stužka “Jelizavieta” intryhoŭna j vykštałcona pakazała pačatak caravańnia słynnaje karalevy, a aktrysa Kiejt Błanšet adrazu stałasia znakamitaj.
Kapur vykarystoŭvaje vyjhryšnuju temu – i dadaje novyja stylovyja elementy.
Stryžań karciny – Kiejt Błanšet – vieličnaja, pryhožaja, strymanaja. Karaleva, jakaja pakutuje ad čałaviečaj samoty – i caruje na karyść svajho narodu. Džefry Raš (u roli daradcy Ŭołsinhema) i Samanta Mortan (Maryja Ściuart) – upryhožvajuć stužku aktorskaj hulnioj.
Ale siužet słabiejšy za papiaredniuju stužku, nia ŭsie charaktary paŭnakroŭnyja dyj historyki šakavanyja niedakładnaściami. Kapur robić akcent na šatach, kolerach, rakursach.
Dzivosny ruch kamery sam stajecca hierojem. Kamera krucicca vakoł karalevy, hladzić praź lusterki, zasłony j šyby. Časam heta zališnie, časam hustoŭna, a časam pracinaje manumentalnaj vieličču… i ščymlivym spačuvańniem.
Błakitnyja, zialonyja, čyrvonyja kolery. Hieroi pieraŭtvarajucca ŭ fihury na šachmatnych doškach. Dziŭnyja arnamenty, dzie čałaviek – častka cełaha źmianiajucca šykoŭnymi kadrami z karalevaju na kani. Haryć Niepieramožnaja Armada, viecier raźvivaje karaleŭskija šaty.
Załaty viek pačynajecca…
Seansy ŭ mienskich kinateatrach.
Kamientary