Opij u škarpetkach: u Minsku sudziać iranca za kantrabandu narkotykaŭ

Iraniec atrymaŭ vid na žycharstva ŭ Biełarusi, a ciapier moža «prapisacca» ŭ biełaruskaj turmie.

Były supracoŭnik pasolstva Irana ŭ Minsku papaŭsia na narkotykach. Jaho sudziać za ich kantrabandu i niezakonny abarot. U vypadku pryznańnia viny jamu pahražaje surovaje pakarańnie — da 13 hadoŭ kałonii.

Jak skłałasia žyćcio 39-hadovaha Farchata Machamadniežada na radzimie, nie jasna. A voś u Biełarusi jon vyrašyŭ, vidać, atabarycca nadoŭha. Ažaniŭsia ź biełaruskaj, jakaja naradziła jamu dačku. Atrymaŭ vid na žycharstva. Praŭda, siamiejnyja adnosiny nie załadzilisia. Ciapier žonka, ź jakoj choć i nie žyvuć razam katory hod, ale tak i nie raźvialisia, daje pakazańni na muža. Ludmiła prachodzić na sudzie śviedkaj.

«Paznajomilisia ŭ 2008-m. Pačali sustrakacca. Raśpisalisia praz hod. A ŭ 2010-m u nas naradziłasia dziaŭčynka. Adnosiny nie skłalisia, i praz hod ja syšła. Padała na alimienty. Jon raz na miesiac pryjazdžaŭ i pryvoziŭ hrošy. Šlub nie skasavali, ale ja chaču raźvieścisia. Jon pracavaŭ, jak raskazvaŭ, u pasolstvie Irana — viečaram achoŭvaŭ, a dniom byŭ kiroŭcam. Ja jaho praktyčna nie bačyła. Prychodziŭ pieraapranucca i znoŭ sychodziŭ», — raskazvaje Ludmiła.

Zatrymali ž jaho 8 sakavika 2014. Jon akurat prylacieŭ ź Irana. Apieratyŭniki jaho «viali» niejki čas. Aryštavali na kvatery, dzie zdymaŭ pakoj.

Haspadynia Taćciana taksama prachodzić na sudzie śviedkaj. Praŭda, z časam stali sužycielami.

«Ja dapamahła jamu raspakavać sumku. Tam byli adzieńnie, sałodkaje, pryprava… Ci byli leki niejkija? Voś heta ja nie pamiataju». Sieli pić čaj. I ŭ hety momant u kvateru ŭvarvaŭsia śpiecnaz. «Praz akno — u nas pieršy pavierch, praź dźviery — jany ŭ nas draŭlanyja. Złamali. Farchat zreahavaŭ apošnim na hetyja huki. Vyjšaŭ — nie bieh, jaho jany nie spałochali. Možna skazać, zatarmožany byŭ [jašče ŭ samalocie vypiŭ tabletki ź psichatropami]. Mianie dapytvali. Adzin z apieratyŭnikaŭ sprabavaŭ mianie spravakavać: «Jak ciabie zavuć? Kali i kolki ty siońnia ŭžyła?» A ja navat nie kuru», — pryhadvaje Taćciana.

Pavodle prakurora Baroŭskaha, Machamadniežad pryvioz u Biełaruś zabaronienyja rečyvy z metaj zbytu: 144 hramy opija i 3114 tabletak tramadołu (trochi bolš za 1 kh). Opij jon pravioz u škarpetkach, tabletki — u sumcy.

«Nie pryznaju viny, — zajaviŭ Machamadniežad na sudzie. — Tabletka — heta nie niebiaśpiečnaja reč, a abiazbolvajučaje». Pra opij, praŭda, zmaŭčaŭ. Jon vałodaje rasijskaj, ale nie ŭsio razumieje: dapamahaje pierakładčyk.

Supracoŭnica mytni aeraporta, jakaja ŭ toj dzień afarmlała rejs z Tehierana, patłumačyła, što pry peŭnych umovach narkotyki i psichatropy možna pravozić u Biełaruś. Na takija rečyvy pavinny być vypisany admysłovyja recepty. A kolkaść preparataŭ nie pavinna pieravyšać 3-sutkavuju dozu narkatyčnych i 90-dzionnuju dozu psichatropnych rečyvaŭ. Ale abaviazkova musiać dekłaravacca pry ŭvozie ŭ Biełaruś. 8 sakavika takuju dekłaracyju nie padavali.

Advakat iranca davodzić, što čałavieku, jaki nie vałodaje rasijskaj ci anhlijskaj movami daskanała, niemahčyma sa stendaŭ u aeraporcie daviedacca pra rečy, jakija padlahajuć dekłaravańniu. Mahčyma, u hetym jość racyja. Ale kali jon u škarpetkach chavaŭ opij, vidać, uśviedamlaŭ svajo złačynstva.

Sud praciahvajecca.

***

Što da čaho?

Opij — vysušany małočny sok, jaki atrymlivajuć ź niedaśpiełych makavych hałovak. Sok ujaŭlaje ź siabie sumieś raślinnych ałkałoidaŭ z vysokim utrymańniem marfinu. Opij — syravina dla vyrabu narkatyčnych srodkaŭ.

Tramadoł — sintetyčny apioidny analhietyk. Heta mocny abiazbolvajučy srodak. Jon aktyvuje ŭ čałavieka apioidnyja receptary i vyklikaje efiekt, padobny da narkatyčnaha: ejfaryja, marudnaść, sanlivaść. Vyklikaje zaležnaść. U Biełarusi tramadoł uniesieny ŭ pieralik psichatropnych rečyvaŭ.

• 0
• 0
• 0
• 0
• 0
• 0
• 0
• 0