Zahadčyca adździaleńnia Homielskaha miedycynskaha kaledža abvinavačvajecca ŭ atrymańni chabaru

Sud Centralnaha rajona Homiela razhladaje spravu ŭ dačynieńni da zahadčycy adździaleńnia pavyšeńnia kvalifikacyi Homielskaha miedycynskaha kaledža, jakaja abvinavačvajecca ŭ atrymańni chabaru ad navučencaŭ (čč. 1, 2 art. 430 KK). 

Vykładčyca była zatrymanaja ŭ śniežni 2013 hoda pavodle padazreńnia ŭ atrymańni niezakonnaha ŭznaharodžańnia za spryjalnaje vyrašeńnie pytańniaŭ ab zdačy zalikaŭ.

Na hetym etapie ŭ sudzie dapytvajuć śviedak, bolš za 40 čałaviek. Tak, niekatoryja navučency — a heta miedsiostry, jakija prachodzili ŭ kaledžy kursy pavyšeńnia kvalifikacyi, — dali pakazańni, što ŭ śniežni 2013 hoda pierad zdačaj zaliku jany źbirali hrošy (ad 50 da 100 tysiač rubloŭ), zdavali ich staraście hrupy dla pieradačy zahadčycy adździaleńnia. Zbor hrošaj prachodziŭ dla taho, kab «zalik prajšoŭ spakojna, nie zadavali dadatkovych pytańniaŭ, i kab usie zdali jaho». Tak rastłumačyła starasta adnoj z hrup. Starasta inšaj hrupy adznačyła, što «naohuł heta zaŭsiody tak było, hrošy dla vykładčykaŭ źbirali zaŭsiody, tak pryniata, i kab nie źbirać hrošy — heta navat nie abmiarkoŭvałasia». Miedsiostry rastłumačyli, što adzin raz na piać hadoŭ jany abaviazanyja prachodzić kursy pavyšeńnia kvalifikacyi, i ŭ vypadku nieatrymańnia paśviedčańnia ad prachodžańni takich kursaŭ jany pazbavilisia b dapłat na pracy. 

Zhodna z pakazańniami starasty hrupy, pierad zalikam hrupa sabrała prykładna paŭtara miljona rubloŭ. Na 400 tysiač jany kupili kanctavary dla kaledža, 100 tysiač pieraličyli za pasłuhi mabilnaj suviazi zahadčycy adździaleńnia pavodle jaje prośby, a jašče miljon vyrašyli ŭručyć słužbovaj asobie. Za niekalki dzion da zaliku starasta hrupy pajšła da zahadčycy adździaleńnia i ŭručyła joj pakiet z kanctavarami i kanviert z hrašyma. Potym starastu vyklikali va UUS, i tam jana daviedałasia, što jaje dziejańni byli zafiksavanyja na videa. Starasta hrupy napisała jaŭku z pavinnaj i pryznałasia ŭ davańni chabaru słužbovaj asobie. 

Takija pakazańni dała i jašče adna starasta. Tolki ŭ hetym vypadku hrupa nabyła dla zahadčycy adździaleńnia harbatu i kavu ŭ padarunkavaj upakoŭcy, a ŭ kanviert ukłali 500 tysiač rubloŭ. «My takim čynam chacieli pavinšavać zahadčycu adździaleńnia z nadychodam Rastva i Novaha hoda, padrazumiavajučy, kab da nas niastroha pastavilisia na zaliku», — rastłumačyła miedsiastra. 

U vyniku ŭ dzień zdačy zaliku, pavodle słoŭ śviedak, jany jaho naohuł nie zdavali, heta značyć nie ciahnuli bilety, nie adkazvali na pytańni. «Nas prosta sabrali i razdali paśviedčańni, što my prajšli kursy», — dadała starasta. 

U dakumientacyi ž byli ŭkazanyja numary biletaŭ, jakija nibyta ciahnuli navučency, i pastaŭlenyja adznaki ab zaliku. 

Słuchańni kryminalnaj spravy praciahvajucca. Jašče nieabchodna apytać prykładna pałovu śviedak, vyvučyć dokazy pa spravie, vysłuchać mierkavańni bakoŭ.

• 0
• 0
• 0
• 0
• 0
• 0
• 0
• 0