Turčynaŭ padpisaŭ zakon ab asablivym statusie asobnych rajonaŭ Danbasa
Śpikier Viarchoŭnaj Rady Ukrainy Alaksandr Turčynaŭ ŭ aŭtorak 14 kastryčnika padpisaŭ zakon «Ab asablivym paradku miascovaha samakiravańnia ŭ asobnych rajonach Danieckaj i Łuhanskaj abłaściej».
Pra heta havorycca na sajcie Rady.
Turčynaŭ adpraviŭ dakumient na podpis prezidentu.
Jak viadoma, Rada pryniała hety zakon, a taksama zakon ab amnistyi dla sieparatystaŭ jašče 16 vieraśnia. Aŭtaram abodvuch dakumientaŭ źjaŭlajecca prezident Ukrainy Piatro Parašenka.
Paśla hałasavańnia deputat Anatol Hrycenka zajaviŭ, što zakonaprajekt Parašenki ab Danbasie, tekst jakoha 16 vieraśnia ranicaj byŭ razdadzieny deputatam, adroźnivajecca ad taho dakumienta, jaki byŭ raźmieščany na sajcie Viarchoŭnaj Rady paśla hałasavańnia.
Źmieny tyčylisia vyznačeńnia terytoryi, na jakoj pavinien dziejničać zakon. Zhodna z redakcyjaj zakonaprajekta, jaki źjaviŭsia na sajcie Rady, terytoryi vyznačaje kiraŭnik Antyterarystyčnaha centra.
U toj ža čas deputatam byŭ razdadzieny zakonaprajekt, u jakim pieralik rajonaŭ, haradoŭ i viosak Danieckaj i Łuhanskaj abłaściej, dzie na try hady ŭvodzicca asablivy paradak miascovaha samakiravańnia, vyznačajucca rašeńniem Viarchoŭnaj Rady.
24 vieraśnia stała viadoma, što na sajcie Viarchoŭnaj Rady źjaviŭsia zakonaprajekt u redakcyi, razdadzienaj da hałasavańnia narodnym deputatam.
U kancy vieraśnia Turčynaŭ zajaviŭ, što nie padpiša dakumienty, pakul rehłamientny kamitet nie pravieryć usie zajavy ab parušeńniach padčas hałasavańnia. Nahadajem, padčas hetych hałasavańniaŭ nie pracavała tabło Viarchoŭnaj Rady.
7 kastryčnika rehłamientny kamitet Rady paviedamiŭ, što nie znajšoŭ parušeńniaŭ padčas hałasavańnia.
Piatro Parašenka śćviardžaje, što pryniatyja 16 vieraśnia zakony pa Danbasie nie dajuć hetaj terytoryi nijakaha asablivaha statusu.
Pavodle jaho słoŭ, havorka idzie tolki pra zakon ab asablivym režymie miascovaha samakiravańnia na Danbasie i nijakija asablivyja paŭnamoctvy abo suvierenitet centralnaja ŭłada Ukrainy nikomu nie delehuje.
Kamientary