U Finlandyi sotni čałaviek šukali mužčynu, jaki zabyŭ hrošy ŭ bankamacie
U vychadnyja ŭ sacyjalnych miedyja chutka raźniesłasia navina pra zabytyja ŭ adnym z bankamataŭ horada Łachci (Finlandyja) banknoty. Hrošy pabačyła Channa Chuka, jana ž, u nadziei znajści ŭładalnika hrošaj, apublikavała abviestku ŭ Facebook.
Hrošaj było niašmat — usiaho niekalki dziasiatkaŭ jeŭra, ale dziaŭčyna vyrašyła, što i takaja suma moža być dla kahości važnaj.
«Ja padumała, heta mohuć być apošnija hrošy maładoha čałavieka. Ci pažyłoha, jaki zmoža na hetuju sumu kupić sabie ježy na niekalki razoŭ».
Abviestka sabrała sotni pierapostaŭ i kala dziesiaci tysiač «łajkaŭ». Na dumku mnohich, dziaŭčyna prajaviła ŭzornuju sumlennaść.
U niadzielu ŭviečary abviestku ŭbačyŭ i ŭładalnik hrošaj — Jojonas Mikaeł Kivijoja.
«Ja padumaŭ, što abo zhubiŭ ich, i mahu vinavacić tolki siabie, abo zabyŭsia ich u bankamacie. Dziaŭčynie, jakaja znajšła hrošy, ja skazaŭ: jak dobra, što jość na śviecie takija ludzi, jak jana. Ja vielmi caniu hety ŭčynak, — skazaŭ Kivijoja.
Mužčyna dadaŭ, što strata banknot nie paŭpłyvała na jaho finansavaje stanovišča, ale jon byŭ pryjemna ździŭleny, kali atrymaŭ svaje hrošy nazad.
Vydańnie Yle.fi padkreślivaje, što ŭ Finlandyi heta daloka nie pieršy vypadak, kali zhublenyja hrošy, u tym liku i bujnyja sumy, znachodziać svajho ŭładalnika dziakujučy śviadomaści hramadzian i sacyjalnym miedyja.
Łukašenka znajšoŭ niezvyčajnyja słovy dla spačuvańnia Chamieniei: «vierałomnaja ataka»27
Kamientary