Rokash pra adbor na «Jeŭrabačańnie»: Pačynaješ razumieć, nakolki ž cudoŭna hrać na narmalnym žyvym kancercie
Biełaruski ŭdzielnik «Jeŭrabačańnia»ŭ 2015 hodzie stanie viadomy 26 śniežnia. 4-5 śniežnia prachodzili paŭfinały, ź jakich u nacyjanalny finał prašli 15 udzielnikaŭ. Siarod tych, chto nie prajšoŭ, byŭ i hurt «Rokaš». Aŭtar tekstaŭ i bas-hitaryst hurta Lavon Kazakoŭ raspavioŭ «Našaj Nivie» pra adbor, kankursantaŭ i «fanieru».
«Na samoj spravie, skład udzielnikaŭ byŭ bolš čym strakaty. Ciažka skazać, nakolki ŭsie z udzielnikaŭ raźličvali pieramahčy, ci chacia b vyjści ŭ finał. Ale staralisia ŭsie», — kaža Lavon pra amal sotniu kankursantaŭ.
«Što paradavała asabista mianie - dyk heta dastatkova vialikaja kolkaść hurtoŭ dy vykanaŭcaŭ, jakija rabili svaje pieśni na biełaruskaj movie, — pryhadvaje jon.
«Kali nie ličyć paŭtara kuplety hurta MILKI, u finale biełaruskaj movy nie budzie, što asabista dla mianie vielmi prykra».
«Vielmi šmat sustrakałasia muzykaŭ u vyšyvankach, u vopratcy z elemientami etna-stylu. Heta pryjemny momant, i ŭ peŭnaj stupieni jen śviedčyć pra toje, što pastupova biełaruskaść, biełaruski styl raskručvajecca jak trend», — kaža Lavon, jaki i sam vystupaŭ u čornaj vyšyvanaj kašuli.
Lavon miarkuje, što na takija konkursy varta adsyłać biełaruskamoŭnyja pieśni: «Anhłamoŭnych kampazicyj i tak na hetym konkursie adsotkaŭ 70, a to i bolej. Tamu nie varta dziejničać pa šabłonach i dałučacca da hetaj šeraj masy — treba zrabić svaje, unikalnaje, aryhinalnaje, ni na kaho nie padobnaje i biezumoŭna biełaruskamoŭnaje».
«Bo našaja rodnaja mova adna z samych pryhožych u Jeŭropie, a my nie karystajemsia takim kozyram».
Rokash vystupali ź pieśniaj «Łojma», jakuju adaptavali pad patrabavańni konkursu.
«Nie skažu, što heta atrymałasia prosta. Usie ž taki skaracić hatovuju pieśniu amal što na chvilinu, pamianiać aranžyroŭku, vyrazać niekatoryja miescy akazałasia dastatkova ciažka», — śćviardžaje muzyka i abiacaje ŭ chutkim časie prezientavać poŭnuju viersiju pieśni.
Hurt praktyčna nie rychtavaŭsia da vystupu. Hrać jany musili ŭ pieršy dzień, ale vyśvietliłasia, što ich žyvy vystup nie adpaviadaje ŭmovam konkursu: treba «minusoŭka» i vakał, nijakich žyvych instrumientaŭ.
«Heta nas, kaniešnie, šakiravała. Na ščaście žury z razumieńniem pastaviłasia da našaj situacyi i dazvoliła nam pieranieści naš vystup na piatnicu», — raspaviadaje Lavon. Za noč hurt paśpieŭ zapisać «minusoŭku», ź jakoj i vystupiŭ na nastupny dzień.
Ci ciažka vystupać pad «minus» hurtu, jaki zvyknuŭ hrać nažyva? «Nie stolki ciažka, kolki niepryjemna było adčuvać siabie nie vykanaŭcam, a niejkim elemientam interjeru ź niepadklučanaj hitaraj», — śmiajecca muzyka. Jon zhadvaje, što była epatažnaja ideja pamianiacca instrumientami padčas vystupu, ale ad jaje ŭsio ž admovilisia.
«Zrešty, tolki vystupiŭšy ŭ takich umovach pačynaješ razumieć, nakolki ž cudoŭna hrać na narmalnym žyvym kancercie z žyvym hukam».
Hurt Rokash nie trapiŭ u finał, jak i jašče dziasiatki vykanaŭcaŭ. «Aceńvała ŭdzielnikaŭ žury na čale z Alaksandram Cichanovičam. Padčas vystupaŭ jany rabili niejkija zapisy, vidać, niešta dla siabie adznačali. Nu a ŭžo jakim čynam i pa jakich kryteryjach abiralisia pieramožcy — pra toje nie viedaju», — kaža Lavon.
Razam z Rokash «za bortam» zastalisia zombi-rokiery Sweet Brains, jakich mnohija ličyli favarytami adboru. «Sałodkija mazhi byli b dastojnymi pretendentami pa kancepcyi i epatažnaści, kali b ich pieśnia była całkam aryhinalnym materyjałam, a nie pieraroblenym saŭndtrekam hulni «Plants vs Zombies»», — miarkuje Lavon.
«Pasłuchajcie kampazicyju «Graze the Roof» — sami ŭsie zrazumiejecie».
Lavon nie biarecca kazać, kaho z kankursantaŭ sam abraŭ by dla «Jeŭrabačańnia» — usich vystupaŭ jon nie čuŭ. «Nu a z tych, kaho čuŭ, abraŭ by badaj što bieraściejski hurt Muzzart», — kaža jon.
Pa słovach Lavona, Rokash, prajdzi jany na «Jeŭrabačańnie», rabili b toje ž samaje, što i na adbory. «Inšaje sprava, što zrabili b našuju imitacyju žyvoha vystupu bolš efiektnaj - sa śviatłom, piratechnikaj jakoj. Nu, u zombi b dakładna b nie pieraapranalisia», — śmiajecca muzyka.
Paśla Novaha hodu Rokash płanuje šerah vystupaŭ pa Biełarusi, a viasnoj-letam źbirajecca vystupać za miažoj. «Byli b nie suprać vystupić na Basoviščy ŭ nastupnym hodzie. Razam z tym budziem praciahvać pracavać nad novymi pieśniami dla novaha albomu», — abiacaje Lavon.
Ciapier čytajuć
Zialenski ŭ Vilni: Pakul špic Łukašenki maje bolš pravoŭ, čym narod Biełarusi7
Kamientary