Rasijski prezident Uładzimir Pucin, vystupajučy na kancercie-mitynhu, pryśviečanym dałučeńniu Krymu da Rasii, zajaviŭ, što ruskija i ŭkraincy — heta adzin narod.
Pavodle jaho słoŭ, tak zaŭsiody ličyli ŭ Rasii, i jon sam da hetaha času tak dumaje. U svajoj karotkaj pramovie Pucin paabiacaŭ, što Rasija budzie rabić usio, kab «adnavić narmalnyja miždziaržaŭnyja adnosiny» z Ukrainaj.
Raniej u sieradu Pucin pravioŭ naradu pa prablemach raźvićcia Kryma. Jon padziakavaŭ nasielnictvu paŭvostrava «za vytrymku, za mužnaść, jakija jany prajavili hod tamu», i zajaviŭ, što sankcyi ŭ dačynieńni da Rasii — nie fatalnyja, choć i nanosiać škodu pracy.
«My budziem pieraadolvać ciažkaści, jakija my z vami tak lohka stvarajem sami dla siabie na praciahu ŭsiaho apošniaha času», — zajaviŭ Pucin paźniej, vystupajučy sa sceny.
Jon taksama raspavioŭ pra matyvy, jakija zaachvocili jaho pačać aktyŭnyja dziejańni ŭ Krymie ŭ minułym hodzie.
«My zrazumieli, što ŭ dačynieńni da Kryma havorka idzie nie prosta pra terytoryju, chaj i stratehična važnuju, havorka idzie pra miljony ruskich ludziej, miljony našych suajčyńnikaŭ, jakija majuć patrebu ŭ našaj dapamozie i padtrymcy. My zrazumieli, nakolki ŭsio heta važna dla nas. My zrazumieli, što havorka idzie nie prosta pra terytoryju, jakoj u nas dastatkova, havorka idzie pra histaryčnyja vytoki, pra krynicy našaj duchoŭnaści i dziaržaŭnaści. Havorka idzie pra toje, što robić nas adzinym narodam, adzinaj zhurtavanaj nacyjaj», — adznačyŭ prezident Rasii.
Pucin praśpiavaŭ himn i zajaviŭ prysutnym na mitynhu ŭ centry Maskvy, što kraina imi hanarycca.
Pa śćviardžeńni pravaachoŭnych orhanaŭ Maskvy, na mitynh u centry rasijskaj stalicy pryjšli 110 tysiač čałaviek. Niezaležnaha paćvierdžańnia hetaj ličby niama.
Kamientary