Staŭbcoŭski rajonny vykanaŭčy kamitet zabaraniŭ praviadzieńnie pikieta 3 krasavika ŭ Stoŭbcach u abaronu brukavanaj darohi, paviedamiŭ siabra arhkamiteta pa stvareńni hramadzianskaj inicyjatyvy «Jeŭrapierśpiektyva» Dzianis Kobrusieŭ.
Jak paviedamlałasia raniej, arhkamitet pa stvareńni hramadzianskaj inicyjatyvy «Jeŭrapierśpiektyva» i arhkamitet pa stvareńni Tavarystva amataraŭ historyi 17 sakavika adpravili ŭ Staŭbcoŭski rajonny vykanaŭčy kamitet zajavu ab praviadzieńni pikieta pa ratavańni brukavanaj darohi pad Stoŭbcami (Minskaja vobłaść). U kancy 2014 hoda i pačatku 2015-ha rajonnyja ŭłady pačali piłavać drevy ŭzdoŭž bruku, jakomu bolš jak 80 hadoŭ. Pavodle nieaficyjnaj infarmacyi, ułady majuć namier razburyć brukavanku dla budaŭnictva ab`iaznoj darohi vakoł Stoŭbcaŭ.
Pikiet płanavałasia pravieści dla infarmavańnia hramadzian pra płany źniščeńnia bruku na ŭčastku aŭtadarohi R64 pamiž Stoŭbcami i vioskaj Novy Śvieržań i alei ŭzdoŭž jaje i zboru podpisaŭ pad kalektyŭnym zvarotam hramadzian. Pikiet byŭ zajaŭleny na 3 krasavika ŭ centry Stoŭbcaŭ.
Jak paviedamiŭ Kobrusieŭ, rajonnyja ŭłady arhumientavali admovu tym, što pakolki «rašeńnie rajvykankama na vykanańnie budaŭniča-mantažnych rabot pa kapitalnym ramoncie darohi miascovaha značeńnia P-00025 nie prymałasia, adsutničaje sam pradmiet abmierkavańnia i nieabchodnaść praviadzieńnia hetaha pikieta».
Tym nie mienš u aficyjnym adkazie ŭłady pryznali, što «viaducca raboty pa dobraŭparadkavańni prydarožnaj pałasy, jakija ŭklučajuć u siabie źniščeńnie starych duplistych i paškodžanych małankaj dreŭ, vysiečku chmyźniakoŭ na prylehłych da darohi sielhasuhodździach, praredžvańnie i naviadzieńnie paradku ŭzdoŭž čyhunki».
«Na 2015 hod inšych mierapryjemstvaŭ pa vyšejzhadanym učastku darohi nie praduhledžana», — havorycca ŭ adkazie.
«Admova ŭ praviadzieńni pikieta nijak nie paŭpłyvaje na našu dalejšuju dziejnaść pa abaronie brukavanki, — zaznačyŭ Kobrusieŭ. — Niesankcyjanavanych mierapryjemstvaŭ u hety momant pravodzić nie płanujem. Treba dačakacca adkazaŭ na inšyja našy zvaroty, i tady budziem prymać rašeńnie, jak dziejničać dalej. Kali vieryć miascovym uładam, to brukavanku nie buduć źniščać prynamsi ŭ 2015 hodzie».
Ciapier čytajuć
Jakaja łohika sudoŭ za Hajun? Mužčyna, jakoha zatrymlivali pa hetaj spravie, apisaŭ ubačanaje23
Kamientary