U Dobrušy zabastavali kitajskija rabočyja, jany kałonaj dajšli da Homiela, źbiralisia iści na Minsk FOTY
Jany patrabavali vypłaty zapazyčanaści pa zarobkach.
Ź lipienia, piatnica, 19.20
Paśla zabastoŭki i maršu, jakim kitajskija budaŭniki 2 lipienia prajšli z Dobruša ŭ Homiel, zapazyčanaść im pahasili ŭ poŭnym abjomie. Bolš jany pretenzij nie majuć, paviedamili karespandentu «Našaj Nivy» ŭčorašnija zabastoŭščyki.
Zapazyčanaść pa zarobkach za 3 miesiacy składała ad 9 da 10 tys. juaniej, što pa kursie NB RB ekvivalentna 22,3—24,8 młn biełaruskich rubloŭ, abo ŭ siarednim ad 7,4 da 8,3 młn za miesiac.
2 lipienia
Ranicaj 2 lipienia uzbuntavalisia rabočyja z Kitaja, zaniatyja na budaŭnictvie kardonnaha kambinata ŭ Dobrušy (Homielskaja vobłaść). Kałona rabočych u niekalki socień čałaviek prajšła 25 km z Dobruša ŭ Homiel.
20:21
Pratest kitajskich rabotnikaŭ z Dobruša zhas. Prykładna a 19.20 apošnija strajkoŭcy sieli ŭ aŭtobus. Ich pavieźli ŭ Dobruš.
19.45
Staršynia kancerna «Biellespapierapram» Juryj Nazaraŭ raspavioŭ karespandentu TUT.BY, što bolšaja častka kitajskich budaŭnikoŭ znachodzicca na svaich pracoŭnych miescach. A z tych 200, što pryjšli ŭ Homiel, zavadatarami źjaŭlajucca čałaviek 10. Na dumku čynoŭnika, chutčej za ŭsio, jany buduć departavanyja z našaj krainy.
18.15
Zapał zabastoŭščykaŭ zhas. Pieradavaja hrupa z 70 kitajcaŭ zastajecca kala ŭniviersiteta. Da ich na aŭtobusach pryvieźli astatnich rabočych, što zastavalisia kala kinateatra. Ciapier ich znoŭ da 150 čałaviek. Jany razam stajać na vulicy. Pryjechała šmat milicyjantaŭ. U dvary zahnali dva aŭtazaki. Padjechali dypłamaty. Jany znoŭ pierakonvajuć rabočych adpravicca na aŭtobusach u Dobruš.
17.15
Pieradavaja hrupa z 70 kitajcaŭ dajšła da ŭniviersiteta imia Suchoha i spyniłasia. Da ich znoŭ padjechali dypłamaty, ale razmovy nie atrymałasia.
17.04
Stała viadoma, što na miesca vyjechaŭ pasoł KNR Cuj Cymin — hety fakt BiełaPAN paćvierdzili ŭ pasolstvie KNR.
16.20
Čałaviek 70 rušyła ŭ bok Minska. Ich supravadžaje milicyja. Jašče dzieści stolki ž kitajcaŭ zastałosia kala pradstaŭnikoŭ pasolstva i pracadaŭcaŭ. Uranku z Dobruša vyjšła kala 300 rabočych. Da 16.00 ahulnaja ličba pratestoŭcaŭ skaraciłasia ŭdvaja.
16.17
Zabastoŭščyki znoŭ sieli ŭ chaładku adpačyvać. 20 čałaviek ź ich praciahvajuć pieramovy z pradstaŭnikom dypmisii Kitaja ŭ Minsku i pradstaŭnikom kitajskaj «Karparacyi «Siuań Juań». Padahnali dva aŭtobusy-harmoniki, kab na ich advieźci kitajcaŭ u Dobruš. Ale nichto ŭ ich pakul nie siadaje. Adny viaduć pieramovy, inšyja zaklikajuć padymacca i rušyć dalej. Usio bolš milicyjantaŭ padahnali. Pryjechali dźvie mašyny z chłopcami spartovaha vyhladu.
16.12
Darečy, iduć kitajcy nasamreč u inšy ad Minska bok. Ich niechta nakiravaŭ nie na poŭnač, a na zachad. Jany na Brest kirujucca, ci lišnich bolš za 50 km projduć pa abjaznoj, piša ŭ fejsbuku homielski žurnalist Piatro Kuźniacoŭ.
16.08
Telefony pradstaŭnictva «Karparacyi «Siuań Juań» u Minsku, hienieralnaha padradčyka budoŭli ŭ Dobrušy, nie adkazvajuć.
15.50
Razmova strajkoŭcaŭ z kitajskim dypłamatam nie ŭdałasia.
Jon prapanoŭvaŭ rabočych na mašynach advieźci ŭ Dobruš, dzie i vyrašyć usie pytańni. Niechta zastaŭsia z dypłamatam, ale bolšaść padniałasia i pajšła dalej. Ruchajucca ŭ bok Minska.
15.48
Strajkoŭcy-kitajcy prajšli ŭžo pałovu Homiela. Dziaŭčatki na vulicach kuplajuć dla ich vadu ŭ kramie: vyhladajuć kitajcy zmoranymi i słabymi.
15:47
«My nie vałodajem dakładnaj infarmacyjaj. Nakiravali tudy pradstaŭnikoŭ pasolstva dla vyrašeńnia pytańniaŭ. Padrabiaznaści budziem ahučvać paźniej», — raskazali «Našaj Nivie» ŭ pasolstvie Kitaja ŭ Biełarusi. Pradstaŭnik dypłamatyčnaj słužby admoviŭsia ŭdakładnić, ź jakimi patrabavańniami vystupili kitajskija rabočyja.
15.15
Padjechała dypłamatyčnaja mašyna. Vakoł dypłamata zhurtavalisia kitajcy. Buduć razmaŭlać. Dypłamat niešta kaža kitajcam, a jany aburajucca.
15.00
Rabočyja źbirajucca pieški ŭ Minsk, paviedamlaje z Homiela pazaštatny karespandent «Našaj Nivy» Alaksandr Vialitčanka.
Vialitčanka sustreŭ kałonu kitajcaŭ u Homieli. «Jany iduć pa vulicy Barykina, kala kinateatra «Kastryčnik». Ruchajucca ŭ bok Minska. Pa-rusku nichto nie havoryć. Kažuć tolki «Minsk» i što «dieńhi niet». Idzie čałaviek 100—150. Kałonu supravadžaje milicyja, ludzi ŭ cyvilnym. Ježy ŭ ich niama — tolki piačeńki i šmat vady. Usie mužčyny. Była ŭ ich pradstaŭnica-dziaŭčyna, jakaja razmaŭlała ź milicyjaj. Ale paśla jana adździaliłasia ad kałony. Nijakich płakataŭ u ich niama. Prosta iduć napierad i chočuć dajści da Minska. Ale, miarkujučy pa ich stanie, da kanca horada mohuć nie dajści — stomlenyja. Na skryžavańni litaralna 15 chvilin adpačyli, vady papili i pajšli».
Alaksandr kaža, što čynoŭnikaŭ, jakija b sprabavali zahavaryć z kitajcami, nie bačyŭ.
14.00
«Nie viedaju, chodziać tut sa ściahami. Ja z ranicy ŭ Homiel jeździŭ. Boŭtajucca pa darozie pamiž Homielem i Dobrušam. Heta nie našy rabotniki — treba źviarnucca da kiraŭnictva kampanii «Siuań juań». Nibyta zarobak nie zapłacili», — paviedamiŭ karespandentu «Našaj Nivy» namieśnik staršyni Dobrušskaha rajvykankama Siarhiej Piatroŭski.
Na Dobrušskaj papiarovaj fabrycy «Hieroj pracy» paćviardžajuć, što kitajskija rabočyja pratestujuć z-za prablem z vypłataj zarobkaŭ.
Pa ich słovach, budaŭnikam užo try miesiacy nie płacili zarobku.
12.30
Pieršym infarmacyju pra šeście i zdymki apublikavaŭ u svaim ŽŽ błohier alarmout.
Kałona išła pa trasie ŭ supravadžeńni supracoŭnikaŭ milicyi i AMAPa i za niekalki hadzinaŭ dajšła da Homiela.
Pavodle našaj infarmacyi, budaŭniki admovilisia razmaŭlać z pradstaŭnikami abłvykankama i kirujučaj kampanii. Jany nie žadajuć ni z kim razmaŭlać, akramia pasła Kitaja ŭ Biełarusi.
Pry hetym z boku biełaruskich budaŭnikoŭ, jakija taksama prymajuć udzieł u budaŭnictvie, nie było pretenzij pa apłacie pracy.
Siońnia na fabryku z płanavym vizitam mieŭ pryjechać vice-premjer Uładzimir Siamaška.
U 2012 hodzie ŭrad Biełarusi zapuściŭ techničnaje pieraasnaščeńnie filijała «Dobrušskaja papiarovaja fabryka «Hieroj pracy» AAT «Kirujučaja kampanija chołdynhu «Biełaruskija špalery» z arhanizacyjaj vytvorčaści miełavanych i niemiełavanych vidaŭ kardona. Ahulnyja vydatki pa prajekcie — bolš za 500 młn dalaraŭ, ź jakich amal 350 młn u kredyt na 13 hadoŭ vydzieliŭ Dziaržaŭny bank raźvićcia Kitaja. Zakančeńnie budaŭnictva zapłanavana na viasnu 2016-ha. Na budoŭli ŭ Dobrušy pracuje kala 900 kitajcaŭ.
Kamientary