Bolš za 200 tysiač podpisaŭ sabrała pietycyja na sajcie change.org z patrabavańniem admianić prezidencki ŭkaz ab źniščeńni sankcyjnych praduktaŭ, jakija ŭvoziacca ŭ Rasiju.
Zamiest taho, kab źniščać pradukty, aŭtary pietycyi patrabujuć pryniać zakon «ab biazvypłatnaj pieradačy praduktaŭ i tavaraŭ narodnaha spažyvańnia katehoryjam hramadzian Rasii, jakija žyvuć u niastačy».
«Navošta nam źniščać śviežyja jeŭrapiejskija pradukty, jakimi možna nakarmić vieteranaŭ, piensijanieraŭ, invalidaŭ, šmatdzietnych, paciarpiełych ad pryrodnych kataklizmaŭ i inšych, chto maje patrebu», — havorycca ŭ pietycyi.
Jaje aŭtary źviartajuć uvahu na toje, što paśla padaražańnia niekatorych praduktaŭ mnohija katehoryi rasiejcaŭ vymušanyja abmiažoŭvać siabie ŭ ježy. Na dumku aŭtaraŭ pietycyi, zakon dapamoh by takim ludziam «kampiensavać toje, što jany stracili ŭ vyniku sankcyj».
Na pietycyju ŭžo adreahavali ŭ Kramli: pres-sakratar prezidenta Dźmitryj Piaskoŭ nahadaŭ, što ŭkaz ustupaje ŭ siłu 6 žniŭnia i źjaŭlajecca abaviazkovym dla vykanańnia.
«Pakul treba zychodzić z hetaha», — tak Piaskoŭ adkazaŭ na pytańnie ab mahčymaści pierahladu rašeńnia.
31 lipienia ŭrad Rasii zaćvierdziŭ praceduru źniščeńnia niezakonna ŭviezienych u krainu sankcyjnych praduktaŭ. Zhodna z dakumientam, źniščeńnie «pravodzicca lubym dastupnym sposabam z vykanańniem abaviazkovych patrabavańniaŭ, praduhledžanych zakanadaŭstvam u halinie achovy navakolnaha asiarodździa».
Rašeńnie ab kanfiskacyi i źniščeńni zabaronienaj da ŭvozu pradukcyi buduć prymać Fiederalnaja mytnaja słužba, Raśsielhasnahlad abo Rasspažyŭnahlad. Pazbaŭlacca sankcyjnych praduktaŭ pradpisana ŭ prysutnaści nie mienš za dvuch niezacikaŭlenych asob. Akramia taho, dakumient abaviazvaje zapisvać praceduru na videa i fota z ukazańniem daty i času.
Miž tym Kiraŭnik Raśsielhasnahladu Siarhiej Dankviert anansavaŭ majučy adbycca ŭ čaćvier pačatak źniščeńnia partyj praduktaŭ, uvoz jakich zabaronieny na terytoryju Rasiei ŭ suviazi z praduktovym embarha.
«6 žniŭnia budzie šerah źniščeńniaŭ. Hetyja partyi ŭžo zatrymanyja», — skazaŭ jon.
Abjomy źniščeńnia sankcyjnych praduktaŭ, pavodle jaho słoŭ, nievialikija. «Ja dumaju, što zaraz budzie źniščana nie bolš za niekalki sotniaŭ ton», — vykazaŭ mierkavańnie Dankviert.
Kamientary