kp.md
Prezident Małdovy Nikałaje Cimofci sustreŭsia z pradstaŭnikami Hramadzianskaj płatformy «Hodnaść i praŭda», jakaja arhanizavała biesterminovyja akcyi pratestu suprać uładaŭ, a taksama namiotavy haradok na centralnaj płoščy małdaŭskaj stalicy, paviedamili ŭ pres-słužbie kiraŭnika Małdovy.
«Prezident Nikałaje Cimofci, adkazvajučy na patrabavańni manifiestantaŭ, zajaviŭ, što jon, taksama jak i pratestoŭcy, zastajecca prychilnikam ŭsienarodnaha abrańnia prezidenta. Prezident paćvierdziŭ svaju zaniepakojenaść prablemami ŭ śfiery pravasudździa, u finansava-bankaŭskim siektary, i što, u mieru svajoj kampietencyi, raspačnie ŭsie zakonnyja miery dla chutčejšaha ŭrehulavańnia kryzisnaj situacyi», — havorycca ŭ paviedamleńni.
Cimofci zapeŭniŭ pratestujučych, što pravaachoŭnyja orhany krainy i nadalej buduć achoŭvać hramadski paradak u centry małdaŭskaj stalicy, dzie raźmieščany namiotavy haradok, z tym, kab manifiestacyi prachodzili vyklučna ŭ mirnym rečyščy.
Pradstaŭniki Hramadzianskaj płatformy «Hodnaść i praŭda», u svaju čarhu, zajavili, što jany ŭžo nie nastojvajuć na adstaŭcy prezidenta.
A patrabujuć adpravić u adstaŭku kiraŭnika Nacyjanalnaha banka, hienieralnaha prakurora, kiraŭnika Centra pa baraćbie z karupcyjaj i staršyni Vyšejšaha Savieta justycyi, tak jak hetyja asoby, na ich dumku, vinavatyja ŭ finansava-bankaŭskim kryzisie.
Nahadajem, u niadzielu, 6 vieraśnia, na Płoščy Vialikaha Nacyjanalnaha schodu ŭ Kišyniovie pačałasia biesterminovaja akcyja pratestu. U centry Kišyniova, pierad budynkam ŭrada Małdovy, byŭ ustalavany namiotavy haradok «Hodnaści i praŭdy». Haradok naličvaje bolš za 150 namiotaŭ.
Kamientary