Viarchoŭny ataman HA «Usiebiełaruskaje abjadnanaje kazactva» Mikałaj Jarkovič znoŭ zaklikaŭ kazakoŭ hałasavać na vybarach za Alaksandra Łukašenku. Pra heta havorycca ŭ zvarocie viarchoŭnaha atamana «da kazakoŭ Respubliki Biełaruś i ŭdzielnikaŭ bajavych dziejańniaŭ».
«Ja, jak viarchoŭny ataman, źviartajusia da ŭsich kazakoŭ, jakija žyvuć na biełaruskaj ziamli, da vas, maje bajavyja siabry, jakija sa zbrojaj u rukach abaraniali intaresy našaj dziaržavy ŭ roznych kropkach płaniety, da vas spadary hienierały, aficery, praparščyki, siaržanty i radavyja, dla jakich honar i Ajčyna vyšejšyja za ŭsio, da ŭsich hramadzian našaj krainy — pryjści 11 kastryčnika 2015 hoda na vybarčyja ŭčastki i padtrymać dziejnaha prezidenta, viarchoŭnaha hałoŭnakamandujučaha, Alaksandra Ryhoraviča Łukašenku», — havorycca ŭ zvarocie.
Nahadajem, rašeńnie ab padtrymcy na vybarach, jakija majuć adbycca, dziejnaha prezidenta Usiebiełaruskaje abjadnanaje kazactva pryniało na pasiadžeńni Vialikaha kruha 11 listapada 2013 hoda. 16 vieraśnia hetaha hoda na pašyranym pasiadžeńni Savieta atamanaŭ Biełarusi taksama było padkreślena, što kazaki padtrymlivajuć vyłučeńnie Łukašenki.
Jak rastłumačyŭ tady kiraŭnik pres-centra kazactva Respubliki Biełaruś pałkoŭnik Ivan Maščanka, pradstaŭniki kazackich ruchaŭ nie padtrymlivajuć vyłučeńnie RHA «Biełaruskaje kazactva» Mikałaja Ułachoviča kandydatam u prezidenty.
«Nie mahli padtrymać vyłučeńnie Ułachoviča, tamu što dla taho, kab ataman bałatavaŭsia i nazyvaŭsia atamanam, jamu nieabchodna rašeńnie kruha kazakoŭ ci chacia b pasiadžeńnia Savieta atamanaŭ. Ni toje, ni druhoje zroblena nie było. Ludziej prosta ŭviali ŭ zman, što viarchoŭny ataman idzie na vybary», — zajaviŭ Maščanka.
Pavodle słoŭ kiraŭnika pres-centra, na hetym tydni ŭ abłasnych centrach projduć pasiadžeńni rehijanalnych savietaŭ atamanaŭ, «dzie jany buduć reahavać na zvarot viarchoŭnaha atamana».
Kamientary