Statkievič, Bialacki i Sańnikaŭ zaklikali Jeŭrasajuz zachavać sankcyi suprać režymu Łukašenki
Troje viadomych byłych biełaruskich palitviaźniaŭ — pravaabaronca, staršynia Pravaabarončaha centra «Viasna» Aleś Bialacki, kandydat na prezidenckich vybarach 2010 hoda i lidar Biełaruskaj sacyjał-demakratyčnaj partyi (Narodnaja Hramada) Mikoła Statkievič, i kandydat na prezidenckich vybarach 2010 hoda, lidar hramadzianskaj kampanii «Jeŭrapiejskaja Biełaruś» Andrej Sańnikaŭ nakiravali adkryty list lidaram Jeŭrasajuza z zaklikam zachavać sankcyi ŭ dačynieńni da biełaruskich aficyjnych asob i jurydyčnych asob u poŭnym abjomie.
Usie troje prajšli praz advolnyja zatrymańni, niespraviadlivyja sudy i katavańni padčas śledstva i ŭ miescach źniavoleńnia. Ich, jak i astatnich palitviaźniaŭ, biełaruskija ŭłady vyzvalili tolki dziakujučy mižnarodnamu cisku, ale nie adnavili ŭ pravach. U svaim liście na imia Viarchoŭnaha pradstaŭnika ES pa zamiežnych spravach i palitycy biaśpieki Fiederyki Mahieryni i ministraŭ zamiežnych spraŭ usich krain-siabroŭ ES Bialacki, Statkievič i Sańnikaŭ zaklikali nie admianiać i nie prypyniać sankcyi da vykanańnia ŭsich umoŭ ES, uklučajučy reabilitacyju ŭsich byłych palitviaźniaŭ i značnaje palapšeńnie situacyi z pravami čałavieka.
«My nastojliva zaklikajem Radu ES ustrymacca ad prypynieńnia abo źniaćcia kropkavych abmiežavalnych mier u dačynieńni da biełaruskich aficyjnych i jurydyčnych asob da taho času, pakul nie buduć vykananyja ŭsie ŭmovy, jakija źmiaščajucca ŭ rašeńniach Rady. Hetyja ŭmovy, jakija byli jasna paznačanyja ŭ 2011 hodzie i paŭtorany ŭ 2012, 2013 i 2014 hadach, zaklučajucca ŭ nastupnym: «nieadkładnaje vyzvaleńnie i reabilitacyja ŭsich palityčnych źniavolenych i značnyja palapšeńni ŭ halinie pavahi pravoŭ čałavieka, viaršenstva prava i demakratyčnych pryncypaŭ». Akramia vyzvaleńnia palityčnych źniavolenych, inšyja ŭmovy nie vykananyja», — havorycca ŭ liście.
Nie byli rasśledavanyja žorstkija dziejańni ŭładaŭ paśla prezidenckich vybaraŭ 19 śniežnia 2010 hoda, uklučajučy palicejski hvałt u dačynieńni da demanstrantaŭ, zatrymańnie bolš za 700 čałaviek, katavańni i biesčałaviečnaje abychodžańnie z zatrymanymi, niespraviadlivyja sudy, u vyniku jakich było asudžana bolš za 40 čałaviek, pryznanych palityčnymi viaźniami.
Urad Biełarusi nie vykanaŭ nijakich rekamiendacyj mižnarodnych arhanizacyj, jakija tyčacca pravoŭ čałavieka i viaršenstva zakona, stanovišča ź jakimi tolki pahoršyłasia paśla žorstkich dziejańniaŭ uładaŭ zimoj 2010 — viasnoj 2011 hadoŭ. Situacyja ŭ Biełarusi pierarasła ŭ zaciažny kryzis, dzie parušeńni pravoŭ čałavieka nosiać «sistemny i sistematyčny» charaktar, pa vyznačeńni Śpiecyjalnaha dakładčyka AAN pa situacyi z pravami čałavieka ŭ Biełarusi. Heta vyklikana pryniaćciem šerahu represiŭnych zakonaŭ i prymianieńniem usio bolš represiŭnych mier, jakija rujnujuć asnoŭnyja svabody.
Urad Biełarusi admaŭlajecca ad supracoŭnictva ź mižnarodnymi pravaabarončymi miechanizmami pa najbolš važnych pytańniach pravoŭ čałavieka i nie pryznaje mandat Śpiecyjalnaha dakładčyka AAN pa situacyi z pravami čałavieka ŭ Biełarusi.
Ni adzin były palityčny źniavoleny nie byŭ reabilitavany.
Kali budzie pryniata rašeńnie ab častkovym abo poŭnym prypynieńni sankcyj, heta budzie aznačać, što Jeŭrasajuz faktyčna ŭchvalaje biespakaranaść i represii, jakija praciahvajucca ŭ Biełarusi. Biez rašučych patrabavańniaŭ z boku mižnarodnaj supolnaści pa źmianieńni zakanadaŭstva i pryniaćcia inšych mier, umovy dla praciahu režymam praktyki «handlu zakładnikami» zachavajucca, havorycca ŭ liście byłych palityčnych źniavolenych.
Kamientary