Biełaruskamoŭny startap voźmie ŭdzieł u Web Summit — najbujniejšaj technałahičnaj kanfierencyi ŭ śviecie
U prahramu, aryjentavanuju na startapy na rańniaj stadyi, prachodziać tolki 10% usich zajaŭnikaŭ. U 2015 hodzie takich kampanij – piaćdziasiat. Dla ŭdziełu adbirajuć pierśpiektyŭnyja anłajn/mabilnyja rašeńni z mahčymaściu dalejšaj maštabizacyi.
Budučych adzinarohaŭ (startapy, jakija kaštujuć 1 młrd dalaraŭ) šukajuć inviestary i žurnalisty.
Ad Biełarusi budzie ŭdzielničać Rexpax.com, handlovaja sacyjalnaja sietka dla paŭsiadzionnaha žyćcia (zapuskajecca ŭ kastryčniku na rynku ZŠA).
Admietna toje, što stvaraje startap biełaruskamoŭnaja kamanda.
«Dla nas heta pryncypova, – kaža zasnavalnik Rexpax.com Michaił Siaredzič. – My ličym, što biełarusy musiać adradžać svaju movu i šanavać kulturu.
Akramia taho, my chacieli b svaim prykładam natchnić maładoje pakaleńnie, i pakazać, što biełarusy zdolnyja stvarać paśpiachovyja biznesy mižnarodnaha ŭzroŭniu».
Mahčymaści znajści aŭdytoryju, inviestaraŭ i stać viadomymi sapraŭdy vialikija.
40 startapaŭ, jakija prajšli praz ALPHA prahramu ŭ 2014 hodzie, atrymali supolnaje finansavańnie bolš za 1 młrd dalaraŭ za pieršy hod paśla padziei.
Sioleta na Web Summit čakajuć 1000 śpikieraŭ i 30000 naviednikaŭ. Padzieju buduć aśviatlać 1300 žurnalistaŭ.
Rexpax.com – heta startap u śfiery ecommerce, aryjentavany na hłabalny rynak, jaki maje mahčymaść stać novym Facebook.
Web Summit, jaki projdzie 3–5 listapada 2015 h. u Dublinie, nazyvajuć «najlepšaj technałahičnaj kanfierencyjaj na płaniecie».
Arhanizatary ceniać jaho najbolš za mahčymaści netvorkinhu, dzie sustrakajucca pradstaŭniki kampanij sa śpisu Fortune 500, viadomych technałahičnych kampanij i najbolš pierśpiektyŭnych startapaŭ. U minułyja hady samit naviedvali Google, Microsoft, Apple, Amazon, Facebook, Nike, Disney i inšyja.
Kamientary