Mižnarodny valutny fond prahnazuje, što źnižeńnie VUP Biełarusi budzie bolšym, čym čakałasia raniej. Pavodle novaj acenki fondu, VUP Biełarusi ŭ 2015 hodzie moža źnizicca na 3,6%.
Novy prahnoz MVF pryvodzicca ŭ kastryčnickaj spravazdačy fondu World Economic Outlook.
Ekśpierty fondu taksama čakajuć, što ŭ 2016 hodzie recesija ŭ biełaruskaj ekanomicy zachavajecca, i VUP krainy źnizicca na 2,2%. Praź piać hadoŭ, prahnazujuć analityki fondu, mahčymaje ažyŭleńnie ekanamičnaj aktyŭnaści — rost VUP u 2020-m čakajecca na ŭzroŭni 1,6%.
Inflacyja ŭ Biełarusi, havorycca ŭ spravazdačy MVF, u 2015 hodzie čakajecca 16,9% (nahadajem, u 2014-m hodzie spažyvieckija ceny ŭ krainie vyraśli na 16,2%). U 2017 hodzie, ličać ekśpierty fondu, inflacyjnyja pracesy ŭ Biełarusi krychu zapavolacca — rost spažyvieckich cen čakajecca na ŭzroŭni 12,3%.
Pry hetym MVF prahnazuje, što deficyt rachunku biahučych apieracyj płaciežnaha bałansu Biełarusi składzie ŭ 2015 hodzie 4,9% VUP, u 2016-m — 4,3% VUP, u 2020-m — 4,1% VUP.
Varta adznačyć, što ŭ paraŭnańni z krasavickaj acenkaj prahnoz deficytu biahučaha rachunku płaciežnaha bałansu Biełarusi MVF skarektavaŭ u bok palapšeńnia (u krasaviku MVF čakaŭ, što deficyt rachunku biahučych apieracyj składzie ŭ Biełarusi 7% da VUP). Palepšany taksama prahnoz inflacyi — u krasaviku fond čakaŭ, što spažyvieckija ceny ŭ 2015 hodzie vyrastuć na 22,1%.
Adnak zaraz MVF čakaje bolšaha ekanamičnaha spadu ŭ Biełarusi — nahadajem, u krasaviku fond prahnazavaŭ, što VUP skarocicca na 2,3% u 2015 hodzie.
Jak paviedamlałasia raniej, aficyjny prahnoz, zaćvierdžany biełaruskimi ŭładami na 2015 hod, praduhledžvaje rost VUP na 0,2-0,7%. U studzieni—žniŭni, pavodle danych Nacyjanalnaha statystyčnaha kamiteta Biełarusi, VUP źniziŭsia na 3,5%.
Kamientary