Niesupadzieńnie źviestak pa kolkaści tych, chto prahałasavaŭ, pravieryć niemahčyma
Kolkaść hramadzian, jakija pryšli na daterominovaje hałasavańnie, u naziralnikaŭ kampanii «Prava vybaru-2015» i ŭ vybarčych kamisij adroźnivajecca pryblizna na 5,5% štodzień.
Naprykład, pa infarmacyi naziralnikaŭ z 626 vybarčych učastkaŭ tudy ŭ druhi dzień hałasavańnia pryjšło 54 527 čałaviek, a kamisii kažuć pra 57 541 čałaviek. Razychodžańnie z aficyjnymi źviestkami składaje 3014 čałaviek, albo 5,5 %. Takaja ž situacyi nibyta była i na treci dzień hałasavańnia: naziralniki kažuć pra 69 212 čałaviek, jakija pryjšli hałasavać na 624 učastki, a kamisii z tych ža ŭčastkaŭ kažuć pra 72 924 čałavieki. Razychodžańnie ŭ 3 712 čałaviek, albo 5,4 %.
Ci jość miechanizmy, kab pravieryć — chto nasamreč pravy ŭ hetaj situacyi, cikavicca Jeŭraradyjo ŭ sakratara CVK Mikałaja Łazavika.
Łazavik: «Hałasavańnie tajnaje i tamu składana potym šukać, chto pravy, a chto vinavaty. My pavinny kiravacca patrabavańniami zakona. Tak voś – taki miechanizm u zakonie nie prapisany».
Tym nie mienš, Mikałaj Łazavik pryznaje: nieadpaviednaść faktyčnaj kolkaści vybarščykaŭ, jakija pryjšli hałasavać, i pradstaŭlenaj vybarčaj kamisijaj infarmacyi — parušeńnie. Za jakoje praduhledžanaja adkaznaść. Inšaja sprava, što jak vynikaje ź jaho papiarednich słoŭ, dakazać heta parušeńnie praktyčna niemahčyma.
Darečy, kali pa krainie niesupadzieńnie ličbaŭ składaje pryblizna 5,5%, to ŭ Minsku — zvyš 11%. Tak, ahulnaja ličba hramadzian, jakija pryšli na 122 vybarčych ŭčastki ŭ treci dzień daterminovaha hałasavańnia, dzie naziralniki «Prava vybaru-2015» robiać niepieraryŭny padlik vybarcaŭ, skłała 10 688 čałaviek. Pa dadzienych kamisij na hetych ža ŭčastkach prahałasavała 11 941 čałaviek. Razychodžańnie z aficyjnymi źviestkami skłała 1 253 čałavieki, albo 11,7%. U druhi dzień hałasavańnia ličbaŭ naziralnikaŭ i kamisij razychodzilisia na 1091 čałaviek, ci 11%.
***
Nahadajem, u kampaniju pa nazirańni za vybarami «Prava vybaru-2015» uvachodziać vosiem arhanizacyj: Biełaruskaja sacyjał-demakratyčnaja partyja (Hramada), Biełaruskaja Chryścijanskaja Demakratyja, «Havary praŭdu!», «Ruch «Za Svabodu!», Partyja BNF, Biełaruskaja partyja «Zialonyja», niezaležny prafsajuz Radyjoelektronnaj pramysłovaści, arhkamitet Partyi Svabody i prahresu.
Kamientary