MUS budzie i dalej damahacca abmiežavańnia času prodažu ŭ Biełarusi ałkaholu

Ministerstva ŭnutranych spraŭ Biełarusi nie admaŭlajecca ad łabiravańnia abmiežavańnia času prodažu ŭ krainie śpirtnoha, zajaviŭ na pres-kanfierencyi 21 kastryčnika ŭ Minsku namieśnik načalnika ŭpraŭleńnia prafiłaktyki MUS Siarhiej Krasucki.

Nahadajem, hetym letam u pryvatnaści ŭ Minsku byŭ abmiežavany čas realizacyi śpirtnych napojaŭ u handli z 22.00 da 9.00. Adnak u kancy žniŭnia, paśla narady ŭ prezidenta, haradskija ŭłady admianili hetuju zabaronu.

Pavodle słoŭ pradstaŭnika milicejskaha viedamstva, MUS užo nakiravała ŭ Saviet ministraŭ svaje prapanovy. Jany tyčacca pavyšeńnia patrabavańniaŭ da jakaści ałkaholnaj pradukcyi (kab nie było tak zvanych tannych vin), pavieličeńnia akcyznaha składniku ŭ košcie ałkaholu i, adpaviedna, pavyšeńnia jaho cany, vyklučeńnia načnoha handlu, handlu śpirtnym u śpiecyjalizavanych adździełach, uzmacnieńnia adkaznaści za niezakonny abarot ałkaholu. Prapanujecca kanfiskacyja transpartnaha srodku jak pryłady pravaparušeńnia. «My ni ad čaho nie admaŭlajemsia i dalej sprabujem hetyja miery łabiravać», — skazaŭ namieśnik načalnika ŭpraŭleńnia MUS.

Krasucki adznačyŭ, što ŭ adpaviednaści z novaj redakcyjaj dyrektyvy prezidenta № 1 «Ab mierach pa ŭmacavańni hramadskaj biaśpieki i dyscypliny» ŭradu da 1 studzienia 2016 hoda daručana «pryniać miery pa vypracoŭcy miechanizmu i adzinych padychodaŭ orhanaŭ dziaržaŭnaha kiravańnia pa arhanizacyi pracy, skiravanaj na paetapnaje skaračeńnie spažyvańnia nasielnictvam ałkaholnaj pradukcyi».

Jak adznačyŭ kiraŭnik Respublikanskaha centra manitorynhu i previentałohii RNPC psichičnaha zdaroŭja Alaksiej Kralko, «abmiežavańnie dastupnaści ałkaholu — heta tolki adzin z kampanientaŭ usioj pracy pa źnižeńni škodnaha spažyvańnia ałkaholu».

«Hety kampanient u šerahu krain sapraŭdy pracuje. Ministerstva achovy zdaroŭja na praciahu mnohich hadoŭ vystupała za abmiežavańnie nie tolki časavaj, ale i krokavaj dastupnaści ałkaholu, my navat vystupali za pavyšeńnie ŭzrostu, ź jakoha mahčymy prodaž ałkaholu, adnak šmat pravavych aśpiektaŭ, jakija pieraškadžajuć chutka ažyćciavić takija abmiežavalnyja miery», — skazaŭ Kralko.

Što da vynikaŭ ekśpierymientu ŭ stalicy, to, jak zajaviŭ pradstaŭnik MUS, «tam asabliva niama čaho analizavać». «Dva miesiacy — heta nie toj pieryjad, pa jakim možna zrabić niejkija vysnovy, jaki ŭpłyŭ adbyŭsia na kolkaść złačynstvaŭ, učynienych u pjanym stanie. My nie analizavali, tamu što niama nijakaha sensu», — skazaŭ Krasucki.

• 0
• 0
• 0
• 0
• 0
• 0
• 0
• 0