Siryjskaja nacyjanalnaja kaalicyja (SNK), jakuju padtrymlivaje Zachad, śćviardžaje, što rasiejskija pavietranyja ataki stali asnoŭnaj pryčynaj hibieli mirnych žycharoŭ, i prosić AAN ab abaronie.
Pradstaŭnik kaalicyi Nadžyb Hadban zajaviŭ, što rasiejskaja interviencyja ŭ Siryi dapamahaje prezidentu Bašaru Asadu vieści «vajnu ź mirnym nasielnictvam» i likvidavać siły ŭmieranaj apazicyi, choć Maskva zajaŭlaje, što jaje kampanija nakiravanaja suprać «terarystyčnych ekstremisckich hrupovak», pieradaje «Hołas Amieryki».
U liście Radzie Biaśpieki AAN Nadžyb Hadban zajaviŭ, što z pačatku svajoj kampanii 30 vieraśnia rasijskija vajennyja nanieśli bolš za 297 pavietranych udaraŭ. Jon śćviardžaje, što pavodle dadzienych vyratavalnikaŭ siryjskich słužbaŭ hramadzianskaj abarony za hety čas byli zabityja bolš za 436 mirnych žycharoŭ, i «bolš za pałova hetych vypadkaŭ hibieli mirnaha nasielnictva naŭprost źviazvajecca z rasijskimi pavietranymi ŭdarami».
«Pamyłkova mierkavać, što rasiejskija avijaŭdary nakiravany suprać ID, — zaznačaje jon. — Da ciapierašniaha momantu tolki 7% rasijskich avijaŭdaraŭ prypadali na rajony, jakija kantralujucca ID. Vialikaja ža ich častka nanosiłasia pa terytoryi, jakuju kantraluje Svabodnaja siryjskaja armija. Pry naniasieńni rasijskich udaraŭ abjekty ekstremistaŭ nie tolki paźbiahalisia, ale — što jašče horš — ad ich naŭprost vyjhravała ID».
«Rasijskija avijaŭdary dapamahajuć ekstremistam, — praciahvaje pradstaŭnik SNK. — Jany spryjajuć źjaŭleńniu vialikaj kolkaści vymušanych pierasialencaŭ i ŭzmacnieńniu kryzisu ź biežancami. U ciapierašni čas dziasiatki tysiač mirnych žycharoŭ sprabujuć uciačy ad sumiesnaha nastupu rasiejskich vajskoŭcaŭ i siryjskaha režymu na terytoryjach, padkantrolnych apazicyi na poŭdzień ad Alepa».
Nadžyb Hadban prosić AAN ustalavać «zonu, volnuju ad bambardzirovak», dla «abarony mirnaha nasielnictva ŭ Siryi» i vieści nazirańnie za tym, što jon nazvaŭ «rasijskimi parušeńniami mižnarodnaha humanitarnaha i pravaabarončaha zakanadaŭstva».
Tym časam, u apublikavanym na minułym tydni dakładzie AAN havorycca, što ŭ vyniku pavietranych udaraŭ u spałučeńni z naziemnym nadychodam nazirajecca maštabnaje pierasialeńnie mirnaha nasielnictva.
Zhodna z hetym dakumientam, pa mienšaj miery 80131 čałaviek byŭ vymušany pakinuć svaje damy ŭ Idlibie i Chamie z 10 pa 22 kastryčnika. Adnak miascovyja humanitarnyja arhanizacyi, jakija pracujuć u hetych rajonach, dapuskajuć, što kolkaść pierasialencaŭ moža być bolšaj za 100 tysiač.
Kamientary