Hramadzianka Rasii, jakaja abvinavačvajecca ŭ kradziažy šlacham vykarystańnia kampjutarnaj techniki, aryštavanaja ŭ Mahilovie.
Jak paviedamiŭ načalnik adździeła pa raskryćci złačynstvaŭ u śfiery vysokich technałohij UUS Mahiloŭskaha abłvykankama Raman Ramanienka, žančyna arandavała ŭ Mahilovie kvateru i ŭ vieraśni—kastryčniku pry dapamozie virusa-vymahalnika «zarabiła» nie mienš jak 65 młn rubloŭ.
Jon raskazaŭ, što ŭ niejki momant karystalnik internetu bačyŭ na manitory paviedamleńnie nibyta ad imia Ministerstva ŭnutranych spraŭ Biełarusi, jakoje zafiksavała na kampjutary zachoŭvańnie i prahlad zabaronienych parnahrafičnych videamateryjałaŭ. U paviedamleńni havaryłasia, što dziejańni karystalnika ŭtrymlivajuć skład administracyjnaha pravaparušeńnia i ciahnuć za saboj štraf ad 500 tysiač da 2 młn rubloŭ.
Hramadzianinu prapanoŭvałasia na praciahu dźviuch hadzin vypłacić štraf u 500 tysiač rubloŭ, pryčym hrošy treba było pieravieści na numar mabilnaha apieratara «MTS» ci life:). U advarotnym vypadku machlary nibyta abiacali pieradać źviestki ŭ prakuraturu dla raspačynańnia kryminalnaj spravy, a da miesca pražyvańnia ŭładalnika kampjutara nakiravać śledča-apieratyŭnuju hrupu dla zatrymańnia i kanfiskacyi techniki.
«Pravilna składzieny tekst pra abmiežavany čas, śledča-apieratyŭnuju hrupu, prakuraturu i zatrymańnie mieŭ efiekt — spałochanyja ludzi pieravodzili hrošy. Numary «MTS» i life:) byli zarehistravanyja na padstaŭnych asob, dalej hrošy pieravodzili na inšy numar», — raskazaŭ Ramanienka.
Pavodle jaho słoŭ, paśla apłaty štrafu złamyśniki abiacali «źniać abvinavačańni», a kampjutar aŭtamatyčna razbłakavać. Adnak pieravod hrošaj ničoha nie mianiaŭ. Zakryć akno standartnym «kryžykam» nie atrymlivałasia. Braŭzar zakryvaŭsia tolki praz dyśpietčar zadač. Ale pry jaho paŭtornym zapusku staronka sa škodnaj prahramaj adkryvałasia znoŭ. Tolki paśla hetaha paciarpiełyja źviartalisia ŭ milicyju.
Pavodle słoŭ Ramanienki, ustanoŭlena bolš za 130 paciarpiełych, jakija zapłacili hrošy machlaram. «A naohuł nam pastupaje infarmacyja, što zvarotaŭ było tolki na terytoryi Mahiloŭski vobłaści prykładna 2.000», — adznačyŭ jon, paviedamiŭšy, što infarmacyja pra takija machlarskija zvaroty pastupaje i z Homielskaj vobłaści.
Raman Ramanienka raskazaŭ, što rasijanka była zatrymanaja ŭ Mahilovie ŭ kancy kastryčnika. Jana ŭžo ŭziataja pad vartu i joj vystaŭlenaje abvinavačańnie ŭ kradziažy šlacham vykarystańnia kampjutarnaj techniki, učynienym u bujnym pamiery, a taksama ŭ raspracoŭcy i raspaŭsiudžvańni škodnych prahram. Na terytoryi Rasii znachodziacca jaje saŭdzielniki, adznačyŭ supracoŭnik UUS.
Kamientary