Łukašenka: 2016 hod budzie prachodzić va ŭmovach žorstkich biudžetnych abmiežavańniaŭ
Alaksandr Łukašenka ličyć nieabchodnym mabilizavać usie resursy i siły dla ŭzdymu ekanomiki. Pra kiraŭnik Biełarusi zajaviŭ 7 śniežnia na naradzie ab prajektach prahnozu, biudžetu i hrašova-kredytnaj palityki na 2016 hod.
Kiraŭnik dziaržavy adznačyŭ, što siońnia na naradzie detalova razhladajucca płany na nastupny hod, ź jakoha pačynajecca novaje piacihodździe, novy etap u raźvićci krainy. «Hod budzie prachodzić va ŭmovach žorstkich biudžetnych abmiežavańniaŭ, — padkreśliŭ kiraŭnik dziaržavy. - Nam treba zabiaśpiečyć makraekanamičnuju stabilnaść, pry hetym vykanać usie abaviazacielstvy pierad ludźmi. Jak i było abiacana, pryjarytet u ekanomicy — heta čałaviek. Achova zdaroŭja, adukacyja, sacyjalnaja abarona. My budujem ekanomiku viedaŭ. Značyć, našy pryjarytety taksama navuka i pieradavyja, najnoŭšyja technałohii».
Pry hetym kiraŭnik dziaržavy zaŭvažyŭ, što «pakul bolš razmoŭ, čym spravy».
«Biełaruś — suvierennaja kraina. Tamu rašeńnie najaŭnych prablem u ekanomicy ŭ pieršuju čarhu zaležyć ad nas samich, ad taho, jak my pracujem, nakolki ŭmieła handlujem i efiektyŭna prasoŭvajem svaju pradukcyju jak unutry krainy, tak i na źniešnich rynkach», - adznačyŭ jon.
Patrabujučy mabilizavać usie siły dla ŭzdymu ekanomiki, Alaksandr Łukašenka chacieŭ by pačuć vyrazny adkaz na pytańnie, na što raźličvajuć ŭrad i Nacyjanalny bank. «Na bujnyja pradpryjemstvy i novyja prajekty? Ci ž budziem čakać, kali skončycca pałasa niepryjemnaściaŭ u suśvietnaj ekanomicy?» — pacikaviŭsia kiraŭnik dziaržavy.
Łukašenka zapatrabavaŭ ad urada stvaryć takija ŭmovy viadzieńnia biźniesu, kab «inviestary sami prychodzili da nas, sami nieśli hrošy, a nie ich šukali». «Što treba dla hetaha, taksama chaciełasia b pačuć ad urada», — skazaŭ Alaksandr Łukašenka.
Alaksandr Łukašenka źviarnuŭ asablivuju ŭvahu hubiernataraŭ na hetuju prablemu: «Vy niesiacie piersanalnuju adkaznaść za efiektyŭnaje raźvićcio rehijonaŭ. Pryjarytety paznačanyja dla ŭsich, i im treba prytrymlivacca niaŭchilna ».
Kiraŭnik dziaržavy padkreśliŭ, što čakaje ad udzielnikaŭ narady nie hałasłoŭnych abiacańniaŭ i zapeŭnieńniaŭ, spasyłak na źniešnija faktary. «U nas svaje nacyjanalnyja intaresy, jakija treba adstojvać i prasoŭvać», - zajaviŭ Łukašenka.
Pamierła palitźniavolenaja Alena Pankova. Paŭhoda nazad jaje asudzili za ŭdzieł u pratestach7
Kamientary