U Maskvie zahinuŭ 32-hadovy biełarus Raman Mazurenka, zasnavalnik sacyjalnaj płatformy Stampsy
Trahičnaje zdareńnie adbyłosia jašče na pazaminułym tydni – 28 listapada. 32-hadovy Mazurenka pierachodziŭ darohu na piešachodnym pierachodzie na Safijskaj nabieražnaj, kali ŭ jaho na vialikaj chutkaści ŭrezaŭsia ŭsiedarožnik «Rejndž Rovier». Miarkujučy z kamier videanazirańnia, kiroŭca nie źmianšaŭ chutkaść pierad piešachodam. Ad udara biełarusa adkinuła na adlehłaść kala 100 mietraŭ.
Razam ź im byŭ siabra, ale toj svoječasova pabačyŭ lichača i paśpieŭ adskočyć.
Mazurenka pamior u balnicy praź niekalki hadzin, nie prychodziačy ŭ prytomnaść. Jak potym vyśvietliłasia, za rulom aŭtamabila byŭ 25-hadovy maskvič Pavieł Ž., suprać jaho zaviedzienaja kryminalnaja sprava.
U Maskvu Mazurenka pierajechaŭ ź Minska ŭ 2006 hodzie. Jon nazyvaŭ Minsk «sonnym haradkom, jaki spyniŭsia dzieści ŭ 80-ch». Mazurenka byŭ zasnavalnikam płatformy dla vizualnaha kanteksta Stampsy. «Pryhožy instrumient dla stvareńnia fotahistoryj i vizualnych ese», jak kazaŭ sam zasnavalnik.
U 2012 Stampsy atrymaŭ hrant ad prahramy Start Fellows, zasnavanaj Paŭłam Duravym i Juryjem Milnieram. U 2015 hodzie jon abvieściŭ pra pierajezd kampanii ŭ ZŠA. Žyŭ u Ńju-Jorku, ale pryjazdžaŭ u Maskvu da rodnych i siabroŭ.
«Ja ščyra liču, što samym strašnym praklonam dla čałavieka, jaki ciabie mocna pakryŭdziŭ, budzie pažadać jamu stać paśpiachovym u Maskvie. Tamu što ničoha horšaha za heta być nie moža: pośpiech aznačaje, što ty zastaniešsia tut nazaŭsiody.
Hety horad, moža być, padoryć tabie mašynu i kvateru ŭ Srebnym Bary - ale ty da kanca žyćcia budzieš stajać u viečnym zatory pa šlachu z pracy dadomu. Tolki kali ty bolš za ŭsio na śviecie šanuješ svabodu, Maskva dla ciabie budzie prosta tramplinam, a nie lipučkaj», - pisaŭ Mazurenka ŭ adnym z artykułaŭ.
7 śniežnia jamu b spoŭniłasia 33 hady.
Kamientary