Fond «Kraina zamkaŭ» stvaraje łandšaftny park z pamienšanymi kopijami zamkaŭ Vialikaha Kniastva. Park raźmieścicca na dvuch z pałovaj hiektarach ziamli ŭ Ašmianskim rajonie, na bazie ahrasiadziby «Šlachieckaja vakolica» kala vioski Halšany.
Ažyćciavić prajekt dapamahaje Jeŭrapiejski Sajuz. U miežach prahramy ES «Sudziejańnie raźvićciu na miascovym uzroŭni ŭ Respublicy Biełaruś», jakuju realizuje ŭ Biełarusi PRAAN, na stvareńnie parka vydatkavana 18 tysiač dalaraŭ. Jašče kala 7 tysiač stvaralnikam daviadziecca dakłaści.
Da žniŭnia 2016, pavodle ŭmovaŭ prajekta, park musić pryniać naviednikaŭ. Dla pačatku ŭ im zrobiać kopii 10 zamkaŭ. Siarod ich — Mir, Navahrudak, Hrodna, Halšany, Lida, Kreva. Ale buduć nie tolki tyja, što na terytoryi Biełarusi: historyju VKŁ niemahčyma ŭjavić bieź Vilni i Trokaŭ.
«Zamki zrobiać u maštabie 1:25, — kaža kiraŭnik fonda «Kraina zamkaŭ» Aleś Varykiš. – Heta značyć, što viežy Mirskaha zamka buduć mieć vyšyniu 1, 4 mietra». Stvareńniem makietaŭ zajmajucca dva architektary. Za asnovu jany biaruć vyjavy zamkaŭ, što zachavalisia, ale tam, dzie płanaŭ i rekanstrukcyj niama, daviadziecca ŭžyć fantaziju, adznačaje sp.Varykiš. Zamki buduć vyrablenyja z płastyku, kab ich možna było raźmiaščać pad adkrytym niebam.
Aleś Varykiš bačyć park jak miesca dla špacyraŭ i adpačynku. Miž zamkami buduć altanki, darožki, kvietki.
Park «Kraina zamkaŭ» kładziecca ŭ papularny turystyčny maršrut Kreva—Baruny—Halšany. «Ludzi pabyvajuć kala ruinaŭ Halšanskaha, Kreŭskaha zamkaŭ, a paśla pryjeduć da nas, kab pabačyć, jak hetyja abjekty vyhladali, kali byli cełymi. Moža, heta padšturchnie čynoŭnikaŭ bolš aktyŭna zajmacca našymi samymi prablemnymi zamkami ŭ Krevie i Halšanach», — adznačaje Aleś Varykiš.
Ciapier čytajuć
«Siadzieŭ užo 50 sutak, zatrymali jaho dziaŭčynu i brata». Sukamiernik raskazaŭ pra radyjoamatara, aryštavanaha za zdradu dziaržavie4
Kamientary