Lemi Kiłmister, lidar i zasnavalnik brytanskaj rok-hrupy Motorhead, raptoŭna pamior praz čatyry dni paśla taho, jak jamu spoŭniłasia 70 hadoŭ.
Jak paviedamlajuć jaho blizkija, muzykant pamior paśla karotkaj baraćby ź vielmi ahresiŭnaj formaj raku.
Na aficyjnaj staroncy hurtu ŭ «Fejsbuku» havorycca, što chvaroba vyjaviłasia ŭ Lemi tolki 26 śniežnia.
«Naš vysakarodny i mahutny siabar syšoŭ paśla karotkaj sutyčki ź vielmi ciažkaj formaj raku… My nie možam vykazać naša ŭzrušeńnie i naš smutak, prosta niama słoŭ», - havorycca ŭ zajavie hrupy.
«My raskažam bolš u bližejšyja dni, a ciapier, kali łaska … Uklučycie hučna Motorhead, uklučycie hučna Hawkwind [hrupa, u jakoj Lemi hraŭ da Motorhead], uklučycie muzyku Lemi hučna. Vypivajcie, raskazvajcie historyi, uspaminajcie pra žyćcio hetaha cudoŭnaha, vydatnaha čałavieka», - napisali ŭdzielniki hrupy.
U studzieni-lutym 2016 hurt płanavaŭ hastrolny tur pa Jeŭropie ŭ aznamienavańnie 40-j hadaviny Motorhead.
Motorhead
Jan Kiłmister, jaki ŭziaŭ sabie psieŭdanim Lemi, naradziŭsia ŭ Barślemie, hrafstva Stafardšyr, u 1945 hodzie.
U 1975-m jon stvaryŭ hrupu Motorhead. Da 2015 hoda Lemi zastavaŭsia adzinym muzykam ź jaje pieršaha składu.
Ličycca, što Motorhead stajali la vytokaŭ «novaj chvali brytanskaha chevi-mietału» kanca 1970-ch - pačatku 1980-ch hadoŭ, kali hety styl staŭ vielmi papularny spačatku ŭ Złučanym Karaleŭstvie, a potym i pa ŭsim śviecie.
Siarod najbolš viadomych piesień Motorhead - The Ace of Spades i Killed by Death.
Choć hrupa była adnoj z samych viadomych u žanry chard-n-chevi, sam Lemi zvyčajna addavaŭ pieravahu nazyvać svoj styl rok-n-rołam.
Ich maniera ihry sapraŭdy ź ciažkaściu ŭkładvałasia ŭ ramki jakich-niebudź napramkaŭ «ciažkaha mietału» - Motorhead akazaŭ ŭpłyŭ na śpid-, treš-mietał, hučny i padkreślena-hruby huk całkam harmanična spałučaŭsia z papularnym u toj čas pank-rokam.
Usio razam heta dazvoliła Motorhead znajści fanataŭ siarod pradstaŭnikoŭ mnohich subkultur.
Apošni albom hrupa vypuściła ŭ žniŭni 2015 hoda.
U 2011 hodzie pamior były hitaryst Motorhead Majkł Bierstan pa mianušcy Viurcel (pa-anhielsku - «pudziła»). Jon pryjšoŭ u kalektyŭ Motorhead ŭ 1984 hodzie i pravioŭ u hrupie 11 hadoŭ.
A niezadoŭha da śmierci Lemi, 12 listapada, pamior bubnač Fił Tejłar, jaki hraŭ u hrupie z 1975 pa 1984 i z 1987 pa 1992 hady.
Sam Lemi byŭ znakamity svaim chrypłym hołasam i niezvyčajnaj, znaročysta hrubaj manieraj ihry na bas-hitary.
-
«Manueła Łukašenka». U Hiermanii kiraŭnicu rehijona abrazili paraŭnańniem ź biełaruskim dyktataram
-
ZŠA vypadkova departavali mieksikanca, jakoha padazrajuć u najbujniejšym rabavańni kaštoŭnaściej u historyi krainy
-
U «Domie volnaj Biełarusi» ŭ Lvovie ŭšanavali pamiać Michaiła Žyźnieŭskaha. Tam ciapier zachoŭvajecca i pomnik hieroju
Ciapier čytajuć
Zialenski ŭ Vilni: Pakul špic Łukašenki maje bolš pravoŭ, čym narod Biełarusi8
Kamientary