Brytanskim navukoŭcam dazvolili hiennuju madyfikacyju čałaviečych embryjonaŭ
Upraŭleńnie pa apładnieńni i embryjałohii čałavieka Vialikabrytanii dazvoliła navukoŭcam z łondanskaha Instytuta Frensisa Kryka hienietyčna madyfikavać čałaviečyja embryjony.
Asnoŭnaja meta daśledavańnia pad kiraŭnictvam doktara Keci Niakan — zrazumieć, jakija hieny patrebnyja embryjonam dla paśpiachovaha raźvićcia. Navukoŭcy vyvučać pieršyja siem dzion žyćcia jajcakletki paśla apładnieńnia — za hety čas jana dzielicca ad adnoj kletki da kala 250. U hety pieryjad kletki ŭžo arhanizujucca dla vykanańnia peŭnych funkcyj. A ad hienaŭ zaležyć, budzie žyć kletka ci nie.
Miarkujecca, što atrymanyja dadzienyja dapamohuć, u pryvatnaści, palepšyć praces raźvićcia embryjona pry ekstrakarparalnym apładnieńni. Hetaja praca taksama dapamoža ŭ lačeńni biaspłodździa i papiaredžańni vykidyšaŭ i roznych patałohij u dziaciej.
U daśledavańni buduć vykarystanyja tolki addadzienyja dla hetych metaŭ embryjony. Navukoŭcy nie zmohuć pierasadzić embryjony, jakija ŭdzielničali ŭ dośledach, žančynam.
Mižnarodny kansorcyum pa stvałavych kletkach, etycy i pravie Hinxton Group ŭ vieraśni minułaha hoda vypuściŭ zajavu, u jakoj zaklikaŭ dazvolić hienietyčnuju madyfikacyju embryjonaŭ čałavieka. U Jeŭropie padobnyja praktyki zabaronienyja.
A ŭ krasaviku minułaha hoda mižnarodnaja hrupa navukoŭcaŭ zaklikała kitajskich kaleh spynić ekśpierymienty z hienietyčnym źmianieńniem embryjonaŭ z-za niečakana vialikaj kolkaści niepažadanych mutacyj, jakija ŭźnikli ŭ pracesie daśledavańnia.
Kamientary