Namieśnik kiraŭnika MZS: Mižnarodnaje prava nie zabaraniaje śmiarotnaha pakarańnia
U mižnarodnym pravie niama ŭniviersalnaj zabarony na ŭžyvańnie śmiarotnaha pakarańnia, ale Biełaruś hatova abmiarkoŭvać hetaje pytańnie, z ulikam mierkavańnia svajho hramadstva. Pra heta zajaviŭ namieśnik kiraŭnika MZS Biełarusi Valancin Rybakoŭ na mižnarodnaj kanfierencyi «Śmiarotnaje pakarańnie: Pieraadoleńnie roznahałośsiaŭ», jakaja siońnia prachodzić u Minsku.
Rybakoŭ pačaŭ svoj vystup z taho, što pavitaŭ lutaŭskaje rašeńnie Jeŭrasajuza źniać bolšaść sankcyj ź Biełarusi.
— Naša kraina zaŭsiody była i zastajecca adkrytaj dla lubych składanych i supiarečlivych pytańniaŭ, u tym liku, i pravoŭ čałavieka, uklučajučy pytańnie prymianieńnia śmiarotnaha pakarańnia.
Razam z tym, dadaŭ jon, prablemy nie vyrašajucca praz kanfrantacyju i naviazvańnie.
— Viadoma, što, z punktu hledžańnia mižnarodnaha prava, prymianieńnie śmiarotnaha pakarańnia univiersalna nie zabaroniena.
Dypłamat nahadaŭ, što Mižnarodny pakt ab hramadzianskich i palityčnych pravach nakładaje abmiežavańni na hety vid pakarańnia: nielha karać śmierciu niepaŭnaletnich i ciažarnych žančyn. U Biełarusi, dadaŭ Rybakoŭ, ustanoŭleny jašče bolšyja abmiežavańni na śmiarotnaje pakarańnie: u nas jana nie ŭžyvajecca da ŭsich žančyn, niepaŭnaletnim i mužčynam, jakija dasiahnuli na dzień vyniasieńnia prysudu 65 hadoŭ.
Namieśnik kiraŭnika MZS taksama nahadaŭ pra toje, što Kanstytucyja Biełarusi praduhledžvaje časovy charaktar śmiarotnaha pakarańnia - jana ŭžyvajecca da jaje admieny za samyja ciažkija złačynstvy (zabojstva pry abciažarvajučych abstavinach).
- Uličvajučy dadzienuju normu, naša kraina zajmaje uzvažanuju pazicyju na mižnarodnaj arenie pa pytańni prymianieńnia śmiarotnaha pakarańnia. U pryvatnaści, my ŭstrymlivajemsia pry hałasavańni pra maratoryj na śmiarotnaje pakarańnie ŭ Hienieralnaj asamblei AAN.
Rybakoŭ nahadaŭ ab vynikach refierendumu 1996 hoda, kali bolšaść biełarusaŭ padtrymała zachavańnia śmiarotnaha pakarańnia. Takija ž dadzienyja sacapytańniaŭ.
— Nami hety fakt ihnaravacca nie moža i nie budzie. U tym liku, i ŭ ramkach dyjałohu z šanoŭnym jeŭrapiejskimi partniorami.
Dypłamat dadaŭ, što Biełaruś nikoli nie spyniała dyskusiju pa pytańni śmiarotnaha pakarańnia i nia budzie hetaha rabić.
Najaŭnaść śmiarotnaha pakarańnia ŭ Biełarusi — hałoŭnaja pieraškoda na šlachu ŭstupleńnia krainy ŭ Radu Jeŭropy. Śmiarotnaje pakarańnie pryvodzicca ŭ vykanańnie šlacham rasstrełu, da jaho nie mohuć być asudžanyja žančyny, niepaŭnaletnija i mužčyny starejšyja za 65 hadoŭ na momant vyniasieńnia prysudu.
Nahadajem, Biełaruś — adzinaja kraina ŭ Jeŭropie i na postsavieckaj prastory, dzie da hetaha času ŭžyvajecca śmiarotnaje pakarańnie. Z pačatku 1990 hoda da vyšejšaj miery byli pryhavorany bolš za 400 asudžanych, za ŭvieś hety čas prezident pamiłavaŭ tolki adnaho čałavieka.
Kamientary