Kala pasolstva Rasii ŭ Minsku prajšoŭ antyrasijski pikiet

Kala budynka pasolstva Rasii ŭ Minsku 2 krasavika prajšoŭ pikiet suprać rasijskaha šavinizmu i impieryjalizmu. Niesankcyjanavanaja ŭładami akcyja była prymierkavana da Dnia jadnańnia narodaŭ Biełarusi i Rasii.

U akcyi, arhanizavanaj zarehistravanym u Čechii abjadnańniem «Małady front», udzielničała 12 čałaviek. Jany trymali bieł-čyrvona-biełyja ściahi, simvoliku arhanizacyi, a taksama płakaty «Nie sajuzu z bandaj», «Dobry susied — toj, jaki žyvie praz płot», «Pucina ŭ Haahu».

Praź piać chvilin paśla pačatku pikieta da jaho ŭdzielnikaŭ padyšli supracoŭniki milicyi ŭ formie dla składańnia pratakołaŭ. Častka pikietoŭcaŭ nazyvali svaje dadzienyja, adnak niekatoryja admaŭlalisia razmaŭlać ź milicyjanierami. U pryvatnaści, aktyvist «Maładoha frontu» Źmicier Daškievič skazaŭ, što nie razumieje ruskaj movy, i paprasiŭ havaryć ź im pa-biełarusku. Adnak, vierahodna, administracyjny pratakoł byŭ składzieny i ŭ dačynieńni da jaho.

Aktyvisty skandavali łozunhi «Rasija — heta vajna», «Ruki preč ad Ukrainy», «Svabodu Nadziei Saŭčancy».

Pavialičyć

Navakolnyja reahavali na toje, što adbyvajecca, pa-roznamu. Asobnyja mašyny sihnalili ŭ znak salidarnaści, niekatoryja prachožyja padychodzili i dziakavali ŭdzielnikam akcyi. U toj ža čas niekalki pažyłych ludziej padyšli da pikietoŭcaŭ i stali abvinavačvać ich u tym, što jany fašysty i zabivajuć ludziej va Ukrainie.

U kamientaryi žurnalistam paśla akcyi Źmicier Daškievič adznačyŭ: «Naturalna, my nie čakali, što źbiarecca tysiača ŭdzielnikaŭ. Ale ludzi, jakija daviedalisia pra našu akcyju praz sacyjalnyja sietki i paličyli patrebnym pryjści, jany pryjšli. Samaje hałoŭnaje — heta ŭzvysić svoj hołas, skazać, što biełaruskaje hramadstva nie prymaje sajuza z Rasijaj. Było b horš, kali b usie maŭčali, a potym pa rasijskich kanałach raskazvali, jak biełarusy radasna adśviatkavali Dzień jadnańnia».

Na pytańnie, ci sapraŭdy biełaruskaje hramadstva suprać intehracyi z Rasijaj, kali značnaja jaho častka znachodzicca pad upłyvam rasijskaj prapahandy ŭ suviazi z padziejami va Ukrainie, Daškievič adkazaŭ: «Ja viedaju šmat prykładaŭ, kali siarod žycharoŭ Danbasa niekatoryja skroź palcy hladzieli na rasijska-ŭkrainski kanflikt, ale kali pryjšoŭ «ruski śviet», jany pamianiali svajo mierkavańnie i imknucca zrabić tak, kab ich dzieci nie čuli ruskaj movy».

Na jaho dumku, značnaja častka biełaruskich hramadzian taksama źmieniać svajo staŭleńnie da Rasii. «Kali siudy pryjdzie «ruski śviet», prajavicca adkrytaja ahresija, to heta stanie katalizataram tvorčych pracesaŭ, i ludzi buduć pa-inšamu stavicca da Rasii», — ličyć aktyvist «Maładoha frontu».

Pry hetym Daškievič acharaktaryzavaŭ reakcyju ŭładaŭ na pikiet, i ŭ pryvatnaści pravaachoŭnikaŭ, jak niejtralnuju. «Łukašenka padabajecca łaviravać, dahadzić i Rasii, i Zachadu. U pryncypie, heta niejtralnaja reakcyja, tamu što kali my pravodzili akcyi ŭ minułyja hady, nas abo łavili na padychodach da miesca, abo zatrymlivali padčas mierapryjemstva», — skazaŭ jon.

Pavialičyć

Za akcyjaj nazirała bolš za dva dziasiatki supracoŭnikaŭ siłavych struktur u cyvilnym, niekatoryja ź ich zdymali toje, što adbyvajecca, na videakamieru. Taksama na akcyi prysutničaŭ kamandzir minskaha AMAPa Dźmitryj Bałaba i inšyja pradstaŭniki kiraŭnictva HUUS Minharvykankama.

Niekatoryja ź siłavikoŭ cikavilisia ŭ žurnalistaŭ, chto jany i navošta zdymajuć toje, što adbyvajecca. Pry hetym pravaachoŭniki nie nazyvalisia, ale i jakich-niebudź pretenzij nie vystaŭlali.

Pikiet pačaŭsia apoŭdni i doŭžyŭsia kala paŭhadziny. U kancy akcyi prysutnyja praśpiavali himn «Mahutny Boža», paśla čaho razyšlisia. Jakich-niebudź zatrymańniaŭ i incydentaŭ ź milicyjaj nie było.

• 0
• 0
• 0
• 0
• 0
• 0
• 0
• 0