«Łukašenka nie moh zaprasić papu Rymskaha ŭ Biełaruś, nie atrymaŭšy zhody patryjarcha», — Anatol Sidarevič

Alaksandar Łukašenka sustreŭsia z papam Rymskim Franciškam. Padčas sustrečy, na jakoj prysutničaŭ syn Łukašenki Mikałaj, adbyłasia taksama hutarka pantyfika z kiraŭnikom Biełarusi ŭ farmacie «sam-nasam» ciaham saraka chvilin. Alaksandar Łukašenka taksama zaprasiŭ papu Franciška naviedać Biełaruś.

Pavialičyć

Palityk, publicyst i daśledčyk historyi carkvy Anatol Sidarevič hetak prakamentavaŭ sustreču:

«Sorak chvilin — heta standartny čas, jaki ŭdzialaje papa na indyvidualnuju sustreču — sorak chvilin i nia bolš. Heta nie vyklučnaja sustreča: niadaŭna papa sustrakaŭsia z premjer-ministram Polščy, prezydentam Meksyki i hetak dalej.

Što tyčycca źmiestu sustrečy i taho, što pra jaje viadoma, — a mienavita, što Łukašenka zaprasiŭ papu ŭ Biełaruś, — to jon musiŭ mieć na heta zhodu patryjarcha Maskoŭskaha. Kali Łukašenka choča, kab jahonaje zaprašeńnie nie było ŭzrušeńniem pavietra, kab jaho ŭsprymali jak surjoznaha palityka, to papiarednie jon musiŭ damovicca z patryjarcham Kiryłam. Toj fakt, što patryjarch Kirył sustrakaŭsia z papam Franciškam, to mnohija acanili hetuju sustreču, jak uzrastańnie šancaŭ na taki pryjezd. I kali partyjarch Kirył sapraŭdy vyjaŭlaje dobruju volu i pryjaznyja stasunki z Vatykanam, to kali łaska — padćvierdzi svaju pryjaznaść tym, što ty nia suprać pryjezdu papy ŭ Biełaruś.

Čamu Łukašenka jedzie da papy i zaprašaje jaho naviedać Biełaruś? Pa-pieršaje — heta vytłumačvajecca vysokim aŭtarytetam papy ŭ śviecie — heta adzin z najupłyvovych palitykaŭ usiaśvietnaha maštabu. Pa-druhoje — u Łukašenki pa-raniejšamu zastajecca peŭnaja napruha z Zachadam. Pa-treciaje — źviazaŭšy pieršaje i druhoje — nie zabudziem, jakuju rolu mieŭ papa rymski ŭ naładžvańni stasunkaŭ pamiž Kubaj i ZŠA. Łukašenka i nie chavaŭ hetaha žadańnia, kab Vatykan paspryjaŭ naładžvańniu kantaktaŭ pamiž krainami volnaha śvietu i Biełaruśsiu. I kali taki ŭpłyvovy palityk prykładzie peŭnyja namahańni, to heta budzie mieć istotny ŭpłyŭ na źmienu staŭleńnia da Biełarusi z boku mižnarodnaj supolnaści.

Akramia taho, sam pryjezd papy ŭ Biełaruś paspryjaje ŭzrastańniu aŭtarytetu Łukašenki ŭ asiarodku katalikoŭ abodvuch abradaŭ. Bo Łukašenka dakładna viedaje, što jahonaja carkoŭnaja palityka — stvareńnie preferencyj rasiejskaj pravasłaŭnaj carkvie — nie zadavalniaje pratestantaŭ, ryma- i hreka-katalikoŭ. Jany niezadavolenyja tym, što stvoranaja niaroŭnaść pamiž pravasłaŭnaj i inšymi kanfesijami. Tamu hetaja sustreča maje raźlik i na palapšeńnie i ŭnutrypalityčnaha stanovišča taksama.

Tamu Łukašenka, kali jon surjozny palityk, nia moh zaprasić papu Rymskaha ŭ Biełaruś, nie atrymaŭšy zhody patryjarcha. Kali takoj zhody niama, to kiraŭnik krainy — lehkadumny palityk».

Apytanka

• 0
• 0
• 0
• 0
• 0
• 0
• 0
• 0