Pamidoraŭ patłumačyŭ, čamu pajšoŭ pracavać na «kisialoŭski» «Sputnik»
Śpiavak i radyjoviadoŭca nia bačyć ničoha kiepskaha ŭ pracy na Sputnik i nia ličyć, što varta razvažać pra mahčymyja prapahandysckija nastroi Sputnik va ŭmoŭnym ładzie.
Alaksandar Kryvašejeŭ, bolš viadomy jak Alaksandar Pamidoraŭ, pačaŭ pracavać na radyjo «Sputnik Biełaruś», adnym z adhalinavańniaŭ mižnarodnaha prajektu Sputnik kramloŭskaha prapahandysta Dźmitryja Kisialova.
Jak raspavioŭ Pamidoraŭ, jon budzie vieści na radyjo šerah pieradač supolna z kiraŭnikom dziaržaŭnaha ansambla «Pieśniary»Viačasłavam Šarapavym.
«A što tut takoha? — pytaje Pamidoraŭ karespandenta Svabody ŭ adkaz na prośbu paćvierdzić ci abvierhnuć navinu. — Nikomu nie pryhadziŭsia, a im pryhadziŭsia, dyk što?
U mianie jość svaje ŭłasnyja mierkavańni, biezumoŭna, svaje ŭłasnyja pohlady. Ale ŭłasnyja pohlady nia majuć nijakaha dačynieńnia da pracoŭnaha miesca. Heta stary žurnaliscki zakon. A redakcyja całkam biełaruskaja. Kali vy ŭvažlivyja, možacie pahladzieć biełaruskamoŭnuju versiju resursu «Sputnik Biełaruś». Ja staŭlusia da hetaha jak da pracy na viaščańnie».
Na siońnia biełaruskaje adździaleńnie Sputnik, adkrytaje pry ŭdziele biełaruskich uładaŭ, nie było zaŭvažanaje za adkrytaj antybiełaruskaj ci prarasiejskaj prapahandaj. A što budzie rabić Pamidoraŭ, kali biełaruski Sputnik pačnie antybiełaruskuju prapahandu, kali raptam źjaviacca publikacyi suprać niezaležnaści Biełarusi?
«Ja liču, što ciapier vy vielmi niekarektna stavicie pytańni, — adkazvaje Pamidoraŭ. — Vy sprabujecie razvažać va ŭmoŭnym ładzie, a tak, ja liču, razvažać niemahčyma. Redakcyja «Sputnik Biełaruś» całkam biełaruskaja, i ja nie mahu adkazvać za ŭsiu redakcyju, bo ja zajmajusia sektaram, jaki ŭmoŭna pakul zaviecca radyjo. I my zajmajemsia radyjo, tym, što adbyvajecca ŭ nas u Biełarusi, i ŭsie temy, jakija my biarem, tyčacca tolki Biełarusi».
* * *
Alaksandar Kryvašejeŭ — žurnalist, radyjoviadoŭca, šoŭmen i muzyka. Pad pseŭdanimam Alaksandar Pamidoraŭ vystupaje ŭ składzie biełaruskamoŭnaha rok-hurtu Pomidor/OFF, taksama ładzić vystupy z akustyčnym rasiejskamoŭnym prajektam «Ṕjanyje hosti». Braŭ udzieł u muzyčnych prajektach «Narodny albom», «Śviaty viečar», «Ja naradziŭsia tut» i inšych.
Ciapier čytajuć
U Varšavu pryjechała sotnia biełaruskich palitviaźniaŭ16
Kamientary