Pierad pačatkam Jeŭra-2016 było šmat razmovaŭ pra samuju słabuju zbornuju čempijanatu. Adny nazyvali maleńkuju Isłandyju, inšyja – Vienhryju, trecija – Paŭnočnuju Irłandyju. Ad isłandcaŭ u pieršym tury ledźvie vyratavalisia partuhalcy (1:1), vienhry pieramahli Aŭstryju (2:0), voś i Paŭnočnaja Irłandyja adužała Ukrainu, choć ad jaje nichto hetaha nie čakaŭ.
Ukraincy pryjemna ździvili ŭ hulni z Hiermanijaj. Pieršy tajm uvohule našy paŭdniovyja susiedzi prycisnuli «bundesmanšaft», i tolki akrabatyčnyja truki Žeroma Baatenha i nadziejnaja hulnia Manuela Nojera nie dazvolili ŭkraincam zabić.
Dumałasia, što z paŭnočnairłandcami va ŭkraincaŭ dakładna ŭsio atrymajecca. Adnak pradstaŭniki Brytanskich vyspaŭ akazalisia nie takimi prastačkami.
Ukraina nibyta i kantralavała miač u pieršaj pałovie, adnak «zialonyja» byli bolš nacelenyja na varoty. Udary pa varotach 8:5, u stvor – 3:1.
Pieršy hoł u hulni byŭ zabity ŭ pačatku druhoha tajma. Paŭnočnairłandcy vydatna vykarystali standartnaje stanovišča. Olivier Norvud naviesiŭ za štrafnoha, i vieteran «zialona-biełaj hvardyi», 36-hadovy Haret Makoli adpraviŭ miač hałavoj u sietku – 1:0.
Amal adrazu Jaŭhien Sielaźnioŭ moh zabić absalutna identyčny hoł, adnak jon bramnika nie pierahulaŭ.
Druhi hoł byŭ zabity ŭžo na šostaj kampiensavanaj chvilinie druhoha tajma. Najał Makhin apynuŭsia adzin pierad varotami Piatava, kali bramnik niaŭdała adbiŭ miač pierad saboj.
Matč prachodziŭ pry mahutnym hradzie, sudździa navat na niekalki chvilin advodziŭ futbalistaŭ z pola. Zdavałasia b, mahčymaść ukraincam razabracca ŭ sabie, parazmaŭlać. Nie dapamahło. Pieramoha Paŭnočnaj Irłandyi absalutna zasłužanaja.
Ukraina ž uskładniła sabie zadaču vychadu z hrupy amal da niemahčymaści.
Stanovišča ŭ hrupie C: Hiermanija, Polšča pa – 3 punkty (1 hulnia), Paŭnočnaja Irłandyja – 3 (2), Ukraina – 0 (2).
Siońnia jašče zhulajuć Hiermanija — Polšča (22:00).
Kamientary